„საქართველოს ლეიბორისტული პარტიის“ ლიდერმა, შალვა ნათელაშვილმა, დენის ტარიფის გაძვირებასთან დაკავშირებით, რამდენიმე თვის წინათ, საქალაქო სასამართლოს მოთხოვნით მიმართა. სასამართლო სარჩელის განხილვას დღეიდან იწყებს. ამის შესახებ, ნათელაშვილმა, პარტიის ოფისში, გამართულ ბრიფინგზე განაცხადა.

პარტიის ლიდერის თქმით, ელექტროენერგიაზე ტარიფის ზრდა, მოსახლეობის სოციალური მდგომარეობის გაუთვალისწინებლად, კანონდარღვევაა.

„როგორც ცნობილია, არსებულმა მილიონერთა მთავრობამ, ბიუჯეტის შესავსებად, ვერ გახსნა ვერც ქარხანა, ვერც ფაბრიკა, ვერც ეკონომიკა აამუშავა. შეგვიყვანა სიღატაკის არნახულ კოეფიციენტებში და გამოსავალი მონახა იმით, რომ ამ დიდი ზამთრის წინ, გაუბედურებულ მოსახლეობას გაუათმაგა ელექტროენერგიის გადასახადი. 2002 წლის 30 დეკემბერს, „ლეიბორისტული პარტიის“ სარჩელით, საქართველოს საკონსტიტუციო სასამართლომ, როგორც ცნობილია, გამოიტანა უმკაცრესი ვერდიქტი და აკრძალა ელექტროენერგიაზე ტარიფის ზრდა მოსახლეობის სოციალური მდგომარეობის გაუთვალისწინებლად. ამ გადაწყვეტილებას, კანონზე ზემდგომი ხასიათი გააჩნია და შესაბამისად, ყველა ნორმატიული აქტი, რომელიც ეწინააღმდეგება საკონსტიტუციო კონტროლის უმაღლეს გადაწყვეტილებებს, მიღებისთანავე არის ბათილი. ჩვენ მივმართეთ თბილისის საქალაქო სასამართლოს მოთხოვნით, გაუქმდეს დენის ტარიფის გაზრდაზე მიღებული უკანონო გადაწყვეტილება და დღეს, 16:30 საათზე იწყება ისტორიული პროცესი. იმედი გვაქვს, რომ სასამართლო იხელმძღავნელებს არა, ჩვენი მილიარდელი მთავრობით, არამედ იხელმძღვანელებს თავისი გაჭირვებული ხალხის ინტერესებით.

თუკი, „რუსთავი-2“-ისა და ქიბარ ხალვაშის საქმე განიხილეს უმოკლეს ვადებში, რატომ არ შეიძლება ჩვენი სარჩელიც განიხილონ სწრაფად? რატომ? ნუთუ ის 3-4 მლნ რაც დავრჩით არ ვჯობივართ ქიბარ ხალვაშს?“ -აღნიშნა ნათელაშვილმა.