საქართველოს განათლებისა და მეცნიერების მინისტრის, მიხეილ ჩხენკელის განცხადებით, 4 ოქტომბრიდან სააღმზრდელო პროცესი აღდგება როგორც სახელმწიფო, ასევე კერძო საბავშვო ბაღებში.

„4 ოქტომბერს საბავშვო ბაღების მუშაობა სრულად აღდგება. ეს ეხება როგორც სახელმწიფო, ასევე კერძო ბაღებს. ყველა საჯარო და კერძო სკოლაში 4 ოქტომბრიდან სწავლა გაგრძელდება საკლასო ოთახებში. დასწრებით ფორმატში სწავლის გაგრძელება ძალიან დიდი მიღწევაა და ყველას გილოცავთ ამას“, - განაცხადა მიხეილ ჩხენკელმა.

ამასთან, ჩხენკელის თქმით, თუ რომელიმე მშობელი გადაწყვეტს, რომ მათ ურჩევნიათ ბავშვმა კვლავ დისტანციურად, ონლაინ ფორმატში გააგრძელოს მეცადინეობები, სამინისტრო მათ ამის უფლებას მისცემს.

„თუ რომელიმე მშობელი გადაწყვეტს, რომ მათ ურჩევნიათ, ბავშვმა კვლავ დისტანციურად, ონლაინ ფორმატში გააგრძელოს მეცადინეობები, ჩვენ მათ ამის უფლებას ვაძლევთ. შესაბამისად, ეს არჩევანი აქვს თითოეულ მშობელს და გვაქვს მაქსიმალურად მოქნილი სისტემა. ეს სისტემა დიდი ხანია დანერგილია, იმ პერიოდიდან, როცა ცოტა ხნით დასწრებულ ფორმატზე გადავედით. ასეთ დროს ჩვენ მშობლებს ვუტოვებდით არჩევნის შესაძლებლობას. არსებობს პორტალი და სკოლის ადმინისტრაცია კვლავ შეახსენებს მშობლებს, თუ როგორ ხდება ამ პროცესის ლოგისტიკა. ისინი პორტალზე არეგისტრირებენ სურვილს, რომ მათ სურთ სწავლა განაგრძონ დისტანციურ ფორმატში და შემდეგ სკოლა ამას უზრუნველჰყოფს. სანამ პანდემიაა ეს ასე გაგრძელდება“, - აღნიშნა მიხეილ ჩხენკელმა და დაამატა, რომ მსგავსი შესაძლებლობა ეძლევა უნივერსიტეტებსაც და პროფესიულ კოლეჯებსაც.

„იგივე ვრცელდება უნივერსიტეტებზეც და პროფესიულ კოლეჯებზეც. ჩვენ მათ ვაძლევთ უფლებამოსილებას, რომ 4 ოქტომბრიდან სასწავლო პროცესი განაგრძონ დასწრებულ პროცესში. ისინი გადაწვეტილებას ინდივიდუალურად მიიღებენ სამინისტროსთან შეთანხმებით“, - განაცხადა მიხეილ ჩხენკელმა.

მინისტრის თქმით, სკოლებში ყველა მოსწავლისთვის აუცილებელი იქნება პირბადის ტარება.

„სკოლაში ზედმიწევნით დაცული იქნება ყველა რეკომენდაცია და სამედიცინო პროტოკოლი, რათა იქ იყოს სრულად ჯანსაღი გარემო“, – აღნიშნა მიხეილ ჩხენკელმა.