ინტენსიურ თერაპიაში მყოფი პაციენტების მკურნალობაში ქართველ მედიკოსთა დასახმარებლად აშშ-ის მთავრობამ $200,000 დოლარის ღირებულების სამედიცინო აღჭურვილობა რუხის რესპუბლიკურ საავადმყოფოსა და ინფექციური პათოლოგიისა და შიდსის ცენტრს გადასცა.

რადიოლოგიური სისტემა, რომელიც ინფექციურ ცენტრს გადაეცა ფილტვის სხვადასხვა უბანზე რეალურ დროში დაკვირვების შესაძლებლობით, უზრუნველყოფს ინვაზიურ მართვით სუნთქვაზე მყოფ პაციენტებში ვენტილაციის ვიზუალიზაციას, რაც ხელს უწყობს თითოეული პაციენტისთვის მკურნალობის ინდივიდუალური გეგმის შემუშავებას.

PCR სისტემა, რომელიც ასევე საჩუქრად გადაეცა ცენტრს საშუალებას იძლევა, სრულად ავტომატურ რეჟიმში, რეალურ დროში 130-ზე მეტი სახეობის რესპირატორული თუ სხვა დაავადების გამომწვევი პათოგენის ანალიზს, რაც საგრძნობლად ამცირებს ტესტირების დროს.

რუხის რესპუბლიკურ საავადმყოფოს საჩუქრად გადაეცა $110,000 დოლარის ღირებულების რენტგენის მობილური აპარატი, რომელიც ინტენსიური თერაპიის პაციენტების მონიტორინგისთვის იქნება გამოყენებული. მობილური რენტგენი კრიტიკული პაციენტების ცვალებად მდგომარეობაზე განგრძობითი დაკვირვების საშუალებას იძლევა. ეს ჩვენი დახმარების გაგრძელებაა რუხის საავადმყოფოსადმი, რომელშიც 2020 წლიდან 5,000-ზე მეტ COVID-19 პაციენტს, მათ შორის ოკუპირებული აფხაზეთიდან ექვსასს უმკურნალეს. კლინიკაში ასევე აიცრა 31,000 ადამიანი, მათ შორის ადმინისტრაციული გამყოფი ზოლის მიმდებარედ მცხოვრები 500 ინდივიდი.

აღნიშნული აღჭურვილობის საჩუქრად გადაცემა აშშ-ის საელჩოს თავდაცვის სფეროში თანამშრომლობის სამსახურმა აშშ-ის არმიის ევროპული სარდლობის ჰუმანიტარული დახმარების პროგრამის ფარგლებში შეძლო.

ინფორმაციას საქართველოში აშშ-ის საელჩო ავრცელებს.