„დამთავრდა ჩვენს ქვეყანაში ღამის რეესტრი და ღამის ნოტარიუსები“ - ეს განცხადება იუსტიციის მინისტრმა, თეა წულუკიანმა „იმედის“ ახალ პოლიტიკურ ტოქ-შოუში „პოლიტიკა“ გააკეთა. აღნიშნული განცხადება მინისტრმა ტელეკომპანია „რუსთავი-2“-ის გარშემო მიმდინარე მოვლენებისა და აშშ-ს საელჩოს განცხადების კომენტირებისას გააკეთა.

„ღამე არაფერი მომხდარა. ჩვენი მმართველობის პერიოდში ყველაფერი არის ღია და გამჭვირვალე. ვინც სააკაშვილის ცხრა წელი გამოიარა, კარგად ვიცით, რაც ხდებოდა ღამე, შესაბამისად, ეს ჩვენთვის ძალიან მტკივნეულია. და დღეს, რომ ვინმემ თქვას, რომ ღამე ისევ რაღაცეები ხდება, ეს ასე არ ხდება. რაც შეეხება „რუსთავი-2“-ს, ეს ტელეკომპანია გააგრძელებს არსებობას, მთავრობა და მე არ შევეგუებით იმას, რომ „რუსთავი-2“ აღარ იყოს ჩვენთან ერთად.

საქართველოში არ დაიღვრება სისხლი, არ იქნება დესტაბილიზაცია. საჭიროა, ეს აჟიოტაჟი ჩაცხრეს. დროა, ქართულმა საზოგადოებამ დაიჯეროს, რომ წარსული ჩაბარდა წარსულს“ -აღნიშნა წულუკიანმა.

მინისტრმა სასამართლო პროცესის გამჭვირვალობაზეც გაამახვილა ყურადღება და აღნიშნა, რომ თავად ურთმელიძის ადგილას, მეტად გამჭვირვალობას უზრუნველყოფდა.

„ჩემი სტრასბურგული გამოცდილებიდან გამომდინარე, რა ვქნა მაქვს ამის ამბიცია, რომ კიდევ უფრო კარგ გადაწყვეტილებებს დავწერდი, მაგრამ მე არ ვარ მოსამართლე. თუმცა, მე რომ ვყოფილიყავი მოსამართლე, რომ მიმეღო ასეთი გადაწყვეტილება, მას აუცილებლად გამოვიტანდი საჯაროობის პირობებში“- განაცხადა იუსტიციის მინისტრმა.