ტელეკომპანიას „რუსთავი-2“-ის გარშემო მიმდინარე მოვლენებს „დემოკრატიული მოძრაობის“ ლიდერი, ნინო ბურჯანაძე ეხმაურება.

„ჩვენ გვყავს უსუსური ხელისუფლება, რომელიც განსხვავებულ აზრს, არ აქვს მნიშვნელობა სამართლიანს თუ უსამართლოს, ვერ იტანს“ - ეს შეფასება ბურჯანაზემ გადაცემა „არჩევანში“ გააკეთა.

„ის, რაც ახლა ხდება, ეს არ არის სამართლიანობის აღდგენისათვის ბრძოლა, ან ქონების დაბრუნება ვინმესთვის. ბიძინა ივანიშვილს არ მოსწონს „რუსთავი-2“, არ მოსწონს ის კრიტიკა, რაც ამ ტელევიზიისგან მოდის, თუმცა, აქ მეორე მომენტიც არის, არც „რუსთავი-2“ არ არის ობიექტური და ნეიტრალური ტელევიზია. როდესაც „ერთიანი ნაციონალური მოზრაობის“ აქტივისტები ასე ინტენსიურად საუბრობენ თავისუფალ სუტყვაზე, მედიის თავისუფლებაზე, დემოკატიაზე, უნდა ახსოვდეთ ძალიან კარგად, როგორი იყო მედიის თავისუფლება, როგორი იყო თავისუფალი სიტყვა და თუნდაც სასამართლო ენმ-ის დროს. როცა ნაცმოძრაობის ლიდეები საუბრობენ დღეს, რომ საქართველომ დაკარგა თავისუფალი სასამართლო, ეს არის უზარმაზარი ცინიზმი. ამ ცინიზმს უბრალოდ საზღვარი არ აქვს. საქართველოს რომ დაეკარგა თავისუფალი სასამართლო, ამისათვის თავისუფალი სასამართლო მას უნდა ჰქონოდა.

ენმ-ი და „რუსთავი-2“ იღებს იმ ნაყოფს, რომელიც თავის დროზე, „ნაციონალურმა მოძრაობამ“ დათესა. ამიტომ არის, რომ ძალიან ბევრი ადამიანი გულცივად უყურებს „რუსთავი-2“-ის გარშემო მიმდინაე მოვლენებს და ამბობს, რაც გეკუთვნით, ის მიიღეთო. თუმცა, მიმაჩნია, რომ ტელეკომპანიის დახურვა არ არის გამოსავალი. მიმაჩნია, რომ რამდენადაც მიუღებელი არ უნდა იყოს ჩემთვის ესა თუ ის აზრი, ეს იმას არ ნიშნავს, რომ ეს აზრი არ უნდა ჟღერდეს. თუნდაც, არაობიექტური, განსხვავებული აზრი, ხშირ შემთხვევაში, არის ხოლმე გამომაფხიზლებელი. ამ ხელისუფლებას გამოფხიზლება რომ ნამდვილად სჭირდება, ამაზე ორი აზრი არ არსებობს“ - აღნიშნა ნინო ბურჯანაძემ.