„პატრიოტთა ალიანსის“ ლიდერმა, ირმა ინაშვილმა განაცხადა, რომ ბიძინა ივანიშვილი მაქსიმუმ 6-8 თვეში სრულად გადააბარებს ხელისუფლებას „ნაციონალურ მოძრაობას“. მისი თქმით, 20 მუნიციპალიტეტში გამოცხადებული მეორე ტურიდან, მმართველი პარტია ნახევარს მაინც „ნაციონალურ მოძრაობას“ დაუთმობს.

„ჩვენ გამალებით გვებრძვის „ქართული ოცნება“ და მუდმივად გვიყალბებს შედეგებს. ყველას ესმის, რომ წარმოუდგენელია ჩვენს პარტიას ჰქონდეს 1,5 პროცენტი. ჩვენ წლებია მუდმივად ვამხელთ „ქართულ ოცნებას“ „ნაციონალური მოძრაობის“ პოლიტიკურ გაცოცხლებასა და საბოლოო ჯამში, ხელისუფლების გადაბარებაში. 20 ქალაქში მეორე ტურია გამოცხადებული და ნათელია, რომ ნახევარს მაინც „ნაციონალურ მოძრაობას“ მისცემენ. „ქართული ოცნების“ ლიდერები ამტკიცებენ, რომ მიხეილ სააკაშვილი ექვსი წელი იჯდება ციხეში. მე მინდა ყველამ დაიმახსოვროს – არ გავა ექვსი კვირა და მიხეილ სააკაშვილს გამოუშვებენ ციხიდან. ივანიშვილიც, მაქსიმუმ 6-8 თვეში სრულად გადააბარებს ხელისუფლებას. ჩვენ არ შევეგუებით ამ ყველაფერს და აქტიურად ვიმოქმედებთ“, -განაცხადა ირმა ინაშვილმა.