უკვე წელიწადი და რვა თვეა, რაც ცხინვალსა და თბილისს შორის კომუნიკაცია და მიმოსვლა ისტორიულ მინიმუმზეა დაყვანილი. დემოკრატიის კვლევის ინსტიტუტის (DRI) შეფასებით, პანდემიას დე-ფაქტო ხელისუფლება რეგიონის თბილისისგან იზოლაციისთვის იყენებს, რაც თავისუფალი გადაადგილების უფლების შეზღუდვის გარდა, უკიდურესად უარყოფითად მოქმედებს ადგილობრივი მოსახლეობის ჯანმრთელობისა და სიცოცხლის უფლებაზე.

ე.წ. სამხრეთ ოსეთის ტერიტორიაზე ვირუსით გარდაცვლილთა რაოდენობა ოფიციალურად არ ქვეყნდებოდა. სტატისტიკის გამოქვეყნება რამდენიმე დღის წინ დაიწყეს. მოსახლეობა ეჭვობს, რომ ინფიცირებულთა რიცხვი ოფიციალურ მონაცემებზე გაცილებით მეტია.

დღეის მდგომარეობით, განსაკუთრებით ცუდი ვითარებაა ახალგორში. დაბაში, სადაც სულ 800-მდე ადამიანი ცხოვრობს, ყოველდღიურად ოფიციალურად ინფიცირების ოცამდე ახალი შემთხვევა ფიქსირდება. იმის გამო, რომ ადგილზე შესაბამისი ექიმები არ ჰყავთ, ახალგორის საავადმყოფო პრაქტიკულად ცარიელია.

დემოკრატიის კვლევის ინსტიტუტი მოუწოდებს საქართველოს ხელისუფლებას, საერთაშორისო საზოგადოების ჩართულობით, დაუყოვნებლივ დაისახოს და ეფექტიანად განხორციელდეს ცხინვალის ეპიდსიტუაციის მართვის გეგმა. ხარისხიან ჯანდაცვაზე ხელმისაწვდომობის გასაზრდელად, მნიშვნელოვანია, გაიხსნას უკანასკნელ წლებში დაკეტილი საკონტროლო გამშვები პუნქტები და გადასასვლელებთან მოეწყოს ვაქცინაციისა და ტესტირების სამედიცინო პუნქტი; შესაძლებლობის ფარგლებში, ცხინვალს უნდა მიეწოდოს ვაქცინა, სამედიცინო აღჭურვილობა და მედიკამენტები. სურვილის შემთხვევაში, კოვიდით დაავადებულ პაციენტებს უნდა ჰქონდეთ თბილისის კონტროლირებად ტერიტორიებზე არსებულ საავადმყოფოებში მკურნალობის შესაძლებლობა.

ინფორმაციას დემოკრატიის კვლევის ინსტიტუტი (DRI) ავრცელებს.