გავიდა გარკვეული პერიოდი და მიხეილ სააკაშვილი დათანხმდა და საკუთარი სურვილით მიიღო გარკვეული ფაფები და ნატურალური წვენები, - განაცხადა „რუსთავი 2“-ის ეთერში საქართველოს იუსტიციის მინისტრმა, რატი ბრეგაძემ.

„მან თავიდან, შემოსვლისას, როდესაც მიიღო საბანკო ბარათი, და ეს ძალიან სწრაფად მოხდა, სულ რაღაც ორ დღეში შემოსახლებიდან, თავიდან შეიძინა გარკვეული პროდუქტები, შემდეგ, როგორც იცით, მან განაცხადა უარი თითქოს ამ საკვები პროდუქტების მიღებაზე, გავიდა გარკვეული პერიოდი და ის დათანხმდა და საკუთარი სურვილით მიიღო გარკვეული ფაფები სხვადასხვა სახის და ნატურალური წვენები. ასევე, ის აგრძელებს იმ მედიკამენტების მიღებას, რომელიც გამოუწერეს ექიმებმა“, - განაცხადა რატი ბრეგაძემ და დაამატა: „მიხეილ სააკაშვილი ფაფებს, ნატურალურ წვენებს ახლაც ღებულობს, რასაც ვამბობთ, ამას ამყარებს მტკიცებულებები. ეს არის საკვები, ეს აღარ არის სამედიცინო დანიშნულება, ეს არის საკვები, რომელსაც ღებულობს პატიმარი“.

რატი ბრეგაძის თქმით, სააკაშვილის ჯანმრთელობის შესახებ ვრცელდება არაერთი ცრუ ინფორმაცია.

„ეს ხალხი უნდა შეეშვას ცრუ ინფორმაციის გავრცელებას. მიხეილ სააკაშვილის ჯანმრთელობის მდგომარეობაზე უნდა ისაუბრონ ექიმებმა და არა ადვოკატებმა. გუშინაც გავრცელდა ცრუ ინფორმაცია, თითქოს მიხეილ სააკაშვილს დაავიწყდა ელენე ხოშტარიას სახელი; დღეს მიხეილ სააკაშვილმა განაცხადა, რომ მას ძალიან კარგად ახსოვდა ხოშტარიას სახელი. ამით სპეკულირება არ შეიძლება. ექიმებთან გადამოწმებული ინფორმაციის საფუძველზე შემიძლია, გითხრათ, მიხეილ სააკაშვილის ჯანმრთელობის მდგომარეობა არის სტაბილური და ყველა სასიცოცხლო მაჩვენებელი არის ნორმაში“, - განაცხადა რატი ბრეგაძემ.

იუსტიციის მინისტრმა ასევე კომენტარი გააკეთა მედიით გავრცელებულ ინფორმაციაზე იმის თაობაზე, რომ სააკაშვილმა საქართველოში შემოსვლამდე კუჭის ოპერაცია გაიკეთა.

„რაც შეეხება ინფორმაციას, რომელიც შეიძლება, შეეხებოდეს ოპერაციას, ეს არის მისი პერსონალური ინფორმაცია და ამის შესახებ ვერ ვისაუბრებ", - თქვა მინისტრმა.