არც ერთმა ადამიანმა არ გაბედოს და აქციის მოწყობის ორგანიზებას სათავეში არ ჩაუდგეს ციხესთან, რადგან ეს არის წმინდა წყლის პროვოკაცია, რომელიც შემუშავებულია სუს-ში, - განაცხადა „ნაციონალური მოძრაობის“ თავმჯდომარემ, ნიკა მელიამ მთავრობის ადმინისტრაციის შენობისკენ აქციის მონაწილეებთან ერთად მსვლელობისას.

„მინდა მივმართო საზოგადოებას, არც ერთმა ადამიანმა - რამდენი შემოგზავნილი ეყოლებათ - არც ერთმა ადამიანმა არ გაბედოს და აქციის მოწყობის ორგანიზებას სათავეში არ ჩაუდგეს ციხესთან, რადგან ეს არის წმინდა წყლის პროვოკაცია - პროვოკაცია, რომელიც არის შემუშავებული „ქართული ოცნების“ სადღაც, სუს-ში, რომ მერე იქ საფუძველი მივცეთ ჩვენ ხელოვნურად იმიტირებული ბუნტისა და ფიზიკური უსაფრთხოება კიდევ უფრო კითხვის ნიშნის ქვეშ დადგეს მიხეილ სააკაშვილის. ამიტომ, ნებისმიერი ადამიანი, ვინც ჩვენი სახელით, ანუ დემონსტრატების სახელით, ციხესთან აღმოჩნდება და გადაწყვეტს აქციის გამართვას, რბილად რომ ვთქვათ, არ იქნება იქ კეთილი მიზნებისთვის აღმოჩენილი. ამიტომ, არავინ, არავინ შეცდომით თავი არ აღმოაჩინოს გლდანის ციხესთან...

ამ ადამიანებს სურდათ, მიხეილ სააკაშვილის გლდანში ტრანსპორტირების შემდეგ, ხალხი აღელვებულიყო დამატებით, მიცვენილიყო გლდანის ციხესთან და იქ გაგვემართა აქცია, რასაც მოჰყვებოდა გაუთვალისწინებელი შედეგები და მის ფატალურ შედეგებსაც დააბრალებდნენ მათ შორის აქციის მონაწილეებს, ვითომ აქციის მონაწილეებს - სინამდვილეში მათ მიერ მოგზავნილ პროვოკატორებს“, - განაცხადა ნიკა მელიამ.