ჟურნალისტი ელისო კილაძე ირწმუნება, რომ ბიძინა ივანიშვილი ამერიკის შეერთებულ შტატებში გაემგზავრა. მისი თქმით, ოლიგარქმა ვიზაც დაჩქარებული წესით აიღო. ჟურნალისტის თქმით, ამ ინფორმაციას ადასტურებენ როგორც მისი შიდა, ისე გარე წყაროები.

„გაგიკვირდებათ და ბიძინა ივანიშვილი გაემგზავრა აშშ-ში, სადაც მას აქვს სახლი. პირველად ჩავიდა სხვათა შორის, აქამდე ჩემი ინფორმაციით, ის ამერიკაში ნამყოფი არ იყო... ივანიშვილი წავიდა ყველაზე დაცულ ქვეყანაში, ვიზაც მე როგორც ვიცი, დაჩქარებული წესით მიიღო“, - განაცხადა ელისო კილაძემ „მთავარი არხის“ ეთერში, გადაცემა „დღის სტუმარში“.

როგორც მან აღნიშნა, ივანიშვილს ეშინია რუსეთის, რადგან ბოლომდე ვერ შეასრულა პუტინის დავალება და სწორედ ამიტომ შეაფარა თავი შეერთებულ შტატებს, იმის მიუხედავად რომ საფრანგეთის მოქალაქეა.

„მე როგორც ვიცი, მას აქვს ახლადშეძენილი ქონება, საკმაოდ დიდი რეზიდენცია იქ და როგორც ჩანს, ბიძინა ივანიშვილს ძალიან ეშინია და ადამიანურ შიშებს და ქვეყნის შიგნით პროტესტს არ ვგულისხმობ, მე ვგულისხმობ იმ ტრადიციულ შიშებს, რაც რუსეთის მხრიდან ემუქრებათ ხოლმე ასეთი ქვეყნის მმართველებს, როდესაც ისინი მთლად ბოლომდე არ ასრულებენ იმ დავალებებს, რა დავალებებსაც პუტინის რეჟიმი აძლევს ხოლმე“, - აღნიშნა ელისო კილაძემ და დაამატა, რომ ამ ყველაფრის ფონზე „ქართულ ოცნებაში“ სრული ქაოსი და აჟიოტაჟია, რადგან იციან, რომ ივანიშვილი მზადაა ხელისუფლება გადააბაროს კოალიციურ მთავრობას და დანიშნოს რიგგარეშე არჩევნები.