„აქ არის სწორედ წყალგამყოფი, როდესაც ვინმე ბედავს და მსგავს ტყუილს ამბობს, როდესაც ვინმე ჩვენ გვაბრალებს წამებას. და ვინ გვაბრალებს წამებას? – ის რეჟიმი, რომელსაც პატიმრები ჩაჰყავდა და მიცვალებულებზე აბამდნენ?!” – განაცხადა იუსტიციის მინისტრმა რატი ბრეგაძემ სამაუწყებლო კომპანია „რუსთავი 2“-ის ეთერში, „ღამის კურიერში“ სტუმრობისას.

„მინდა, საზოგადოებამ იცოდეს სიმართლე. როდესაც ეს რეანიმობილი გაჩერდა, როგორც ამბობს ბატონი გვარამია, რომ თითქოსდა ეს რეანიმობილი ჩვენ გავაჩერეთ 30 მეტრის მოშორებით სპეციალურად, რომ, როგორც ის ამბობს, მერე გადმოგვეთრია პატიმარი და გვეთრია 30 მეტრი – რა არის? ბუნებრივია, ეს არის უკვე ღირსების შემლახავი მოპყრობა, ხომ?! თითქოსდა უნდა დაენახა ყველა სხვა პატიმარს, როგორ მიათრევდნენ სააკაშვილს, რაც არის მტკნარი სიცრუე, და ეს იხილა საზოგადოებამ – როგორ არის რეანიმობილი მიყენებული ზუსტად პირდაპირ პანდუსთან და სწორედ აქ მოხდა მისი გადმოყვანა”, – განაცხადა რატი ბრეგაძემ და დაამატა, რომ ამგვარი მცდარი ინფორმაციის გავრცელება მიზნად ისახავს „ძალიან საშიშ ტენდენციას“ და ემსახურება სახელმწიფო ინსტიტუტებზე შეტევას.

„ეს იყო მორიგი ტყუილი, რომელიც მიზნად ისახავს ძალიან საშიშ ტენდენციას და ეს არის სახელმწიფო ინსტიტუტებზე მიზანმიმართული შეტევა, დასუსტების მცდელობა, რასაც ძალიან სახიფათო და გამოუსწორებელი შედეგები შეიძლება მოჰყვეს საზოგადოებისთვის. და კიდევ ერთხელ ვამბობთ, რომ ჩვენ ნებისმიერი სცენარისთვის ვართ მზად, არ გვეშინია არც მათი ბულინგის, არც მათი ტროლების, არც მათი უზრდელური გამონათქვამების და არც მათი კუნთებზე ყურების; ამისი არავის ეშინია. ჩვენ ვართ ნებისმიერი სცენარისთვის მზად და, პირველ რიგში, იმისათვის, რომ ნებისმიერ ფასად დავიცვათ ყველა პატიმრის ჯანმრთელობა და უფლებრივი მდგომარეობა. ამაში ვერავინ შეგვიშლის ხელს”, - განაცხადა იუსტიციის მინისტრმა.

მისი თქმით, ოპონენტები დესტრუქციული ქმედებებით, სიძულვილის ენის გავრცელებით ავლენენ თავის სახეს და ამ ყველაფერს მაყურებელი ხედავს.

„ერთხელ და სამუდამოდ უნდა შეწყვიტონ ეს მორალური ტერორი ხალხზე ან კეთილი ინებონ მაშინ და ზოგიერთმა ტელევიზიამ, როდესაც ეს ხალხი გამოდის, დააწეროს +18, რომ ბავშვებმა არ უყურონ ან გაუშვან ღამის საათებში, რადგან ეს არის სამარცხვინოზე სამარცხვინო, რა სახესაც იღებს ამ ხალხის მიერ წარმოებული კამპანია. პირდაპირ მოდის მათგან ღვარძლი და აგრესია იმისათვის, რომ საზოგადოება გააღიზიანონ და გამოიწვიონ დაპირისპირება. ჩვენ ამას, რა თქმა უნდა, მაქსიმალურად ვითმენთ, ვეკიდებით სიფრთხილით, გაგებით; ვცდილობთ, რომ ეს ხალხი განვარიდოთ ერთმანეთს, მაგრამ ცუდ ცეცხლს ეთამაშებიან, რადგან ცდილობენ საზოგადოების დაძაბვას და ამას კარგი შედეგი არასოდეს მოაქვს“, - განაცხადა რატი ბრეგაძემ.