სასამართლოს განჩინებასთან დაკავშირებით, ძალიან უცნაურია, მაგრამ ჩვენ და "რუსთავი 2" ერთი და იგივე პოზიციაზე ვართ, - ამის შესახებ დღეს გამართულ პრესკონფერენციაზე "რუსთავი 2"-ის დროებითმა მმართველმა, დავით დვალმა განაცხადა, რომელმაც დროებით მმართველ რეზო საყევარიშვილთან ერთად, საკუთარი უფლებამოსილება არხის გენერალური დირექტორის პირველ მოადგილე ზაალ უდუმაშვილს გადასცა.

"რაც შეეხება დროებითი მმართველის შემოღების თაობაზე სიჩქარეს – ეს განპირობებული იყო შემდეგით: გვაქვს მრავალი ინფორმაცია იმასთან დაკავშირებით, რომ "რუსთავი 2"-ში ალტერნატიული გეგმები ისახება, ლაპარაკია ახალი ტელევიზიის შექმნაზე, ლაპარაკია აპარატურის დაზიანებაზე ა.შ. რეალურად მოტივაცია იყო ის, რომ ზიანი არ მიდგომოდა თავად ორგანიზაციას და პრობლემა არ შექმნოდა მის ფუნქციონირებას. ამის გამო დავთანხმდით, რომ დროებით მმართველობაში აგვეღო ტელევიზია.

რაც შეეხება სასამართლოს განჩინებას, ის, ჩემი აზრითაც, საკმაოდ ნაჩქარევად იქნა მიღებული. ფორმულირებებმა, რომელიც მასშია დაფიქსირებული, საზოგადოებაში აზრთა სხვადასხვაობა გამოიწვია და მეც ვიზიარებ, რომ საკამათო პუნქტებია ამ დადგენილებაში. ასე რომ, ამ საკითხში, ძალიან უცნაურია, მაგრამ ჩვენ და "რუსთავი 2" ერთიანები ვართ", - განაცხადა დვალმა და იმედი გამოთქვა, რომ ზაალ უდუმაშვილისთვის არხის დროებითი მმართველის უფლებამოსილების გადაცემას დათანხმდება.

"არასდროს არაფერი არ მოხდება ძალით, აღმასრულებლებით და ა.შ. ზუსტად იმის გამო, რომ ჩვენ გვინდა ამის თავიდან აცილება მივედით ამ გადაწყვეტილებამდე. მინდა ხაზგასმით ვთქვა, არანაირი პრობლემა დღეიდან "რუსთავი 2"-ს არ ექნება. მოხსნილია ეს საკითხი ჩვენი მხრიდან. მინდა მოვუწოდო მეორე მხარეს, რომ გაგებით მოეკიდოს ამას. ზაალ უდუმაშვილს დღეიდან აქვს უფლება აფუნქციონიროს "რუსთავი 2", - აღნიშნა დავით დვალმა.