მავანმა, ვინც ამ პროცესებს მართავს, გადაწყვიტა "რუსთავი-2"-ის თანამშრომლების სრული დემონიზება, - ამის შესახებ ტელეკომპანია "რუსთავი-2"-ის საინფორმაციო სამსახურის უფროსი, გიორგი ლაფერაშვილი "ფეისბუქის" საკუთარ გვერდზე წერს.

"ახალი მესიჯბოქსი დარიგდა უკვე: უდუმაშვილი უარს იმიტომ ამბობს, რომ გვარამიას მძევალია - გვარამიას კი თავის მხრივ სიტუაციის განმუხტვა არ სურს. - შეცდომაა. სიმართლე კი ისაა, რომ მავანმა, ვინც ამ პროცესებს მართავს, გადაწყვიტა "რუსთავი 2"-ის თანამშრომლების სრული დემონიზება მოახდინოს და ამ პროცესში უკვე ზალიკოს გასვრის მცდელობაც აქვს.

5 ნოემბრის "ღამის გადაწყვეტილებად" წოდებული განჩინება, რომელმაც სამართლებრივი ჩიხი შექმნა - ხალვაშის მხარის ინიცირებულია. ხალვაშმა თავის წარმომადგენლებად დვალი და საყევარიშვილი დაასახელა. ეს უკანასკნელები დათანხმდნენ საკუთარი უფლებამოსილების განხორციელებას იმ ფორმით, რა ფორმითაც თამაზ ურთმელიძემ განჩინებაში ჩაწერა.

ყველაფერი სხვა: "სიტუაციის განმუხტვაზე" საუბარი, კარგებად და ცუდებად ცალკეული მოთამაშეების წარმოჩენის მცდელობა და განცხადებები "კომპანიის", ან კიდევ უფრო მეტი, "ჟურნლისტებზე" ზრუნვის შესახებ - მხოლოდ მაყურებელზე გათვლილი პიარსვლებია, რომელიც არანაირ სამართლებრივ გამოსავალს ამ სიტუაციიდან არ გვთავაზობს", - წერს ლაფერაშვილი.

მისივე განმარტებით, ჟურნალისტებზე ზრუნვის რამდენიმე კონკრეტული მაგალითი კომპანიის დროებითი მმართველებიდან უკვე იციან: 2004-ში დვალის და 2012-ში საყევარიშვილის მხრიდან.

"კიდევ ერთი პასუხი აქ მომუშავე ადამიანებმა დღეს მივიღეთ, როდესაც პრესკონფერენციიდან ერთ-ერთ ჩვენგანს კომპანიის მართვის და ფინანსური ვალდებულებების გასტუმრების ტვირთი მის დაუკითხავად აკიდეს.

პირადად ჩემთვის ეს უკვე დემონსტრირებაა იმისა, როგორ გეგმავენ მომავალში ჩემი, როგორც ათასიდან ერთ-ერთი თანამშრომლის ინტერესების დაცვას ის ადამიანები, ვინც კომპანიის მართვა საკუთარ თავზე აიღო", - განმარტავს ლაფერაშვილი.