„ევროპული სოციალისტების“ წევრი, დეპუტატი ფრიდონ ინჯია სახალხო დამცველის მიერ შექმნილ ექიმთა ჯგუფის მიერ მიხეილ სააკაშვილის ჯანმრთელობის მდგომარეობაზე შედგენილ დასკვნას გამოეხმაურა და თქვა, რომ ექიმთა ჯგუფის შემადგენლობაში უმრავლესობა „ნაციონალური მოძრაობის“ აქტივია.

„სახალხო დამცველი ამ შემთხვევაში, დესტრუქციული ოპოზიციის მხარეა. როგორც მე გადავხედე და ვნახე ექიმთა ჯგუფის შემადგენლობა, ექიმების უმრავლესობა არის „ნაციონალური მოძრაობის“ აქტივი, თუ წევრი არა“, – განაცხადა ფრიდონ ინჯიამ.

სახალხო დამცველის მიერ შექმნილი ექიმთა ჯგუფი საქართველოს ყოფილი პრეზიდენტის, მიხეილ სააკაშვილის ჯანმრთელობის მდგომარეობასთან დაკავშირებით დასკვნას აქვეყნებს, რომელშიც ნათქვამია, რომ პაციენტის მდგომარეობის კრიტიკულობიდან გამომდინარე, მისი მკურნალობის გაგრძელება დაუყოვნებლივ რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში, კერძოდ, ინტენსიური თერაპიის განყოფილებაში, რის პირობებსაც მე-18 დაწესებულების კლინიკა არ აკმაყოფილებს.