80 მილიონი დოლარი იქნება აუცილებლად გასასტუმრებელი. არბიტრაჟში მიღებული გადაწყვეტილება არ საჩივრდება. ამ ზარალის გამო მთელი მთავრობა კი არ უნდა გადადგეს, ციხეში უნდა იჯდნენ უკვე დამნაშავე პირები, - ამის შესახებ სოციალურ ქსელში „ერთიანი ნაციონალური მოძრაობის“ დეპუტატი რომან გოცირიძე წერს.

„კალაძეს უთქვამს, მე რა შუაში ვარ, თუ 80 მილიონი დოლარი დაგვაკისრა სტოკჰოლმის არბიტრაჟმა რუსული „ინტერრაოს“ სასარგებლოდო?

მაშ, ვინ მოაწერა ხელი 2013 წელს „ინტერრაოსთან”გაფორმებულ მემორანდუმს? გასაჯაროვდეს მისი შინაარსი! ვინ გაყიდა შარშან სახელმწიფოს 25-პროცენტიანი წილი „თელასში“, რომლითაც ქვეყანა ფლობდა გარკვეულ სამართლებრივ ბერკეტებს ამ კომპანიაში? იტყვის, მე რა შუაში ვარ, მერი ვიყავი მაშინ, მინისტრი კი არაო. მაშინ, იმაზე მაინც გასცეს პასუხი, ვინ იყიდა ეს წილი? ამ წილს და სხვა წილებსაც რომ გავყვეთ, სადაც მიგვიყვანს კი ვიცით.

80 მილიონი დოლარი იქნება აუცილებლად გასასტუმრებელი. არბიტრაჟში მიღებული გადაწყვეტილება არ საჩივრდება. ამ ზარალის გამო მთელი მთავრობა კი არ უნდა გადადგეს, ციხეში უნდა იჯდნენ უკვე დამნაშავე პირები“, - აცხადებს რომან გოცირიძე.

კახა კალაძემ კი განაცხადა, რომ „ინტერ რაოსთან“ ხელშეკრულება წინა ხელისუფლების პირობებში დაიდო და ენერგეტიკის მინისტრობის დროს, მან უარი თქვა კომპანიისთვის 200 მილიონი დოლარის გადახდაზე.