დიდ დიღომში საფეხბურთო ცენტრის მიმდებარე ტერიტორიაზე კიდევ ერთი რეკრეაციული სივრცე მოეწყობა, - ამის შესახებ დედაქალაქის მერმა, კახა კალაძემ მუნიციპალიტეტის მთავრობის დღევანდელ სხდომაზე განაცხადა.

მისი თქმით, თბილისის მერია ითვალისწინებს ადგილობრივი მოსახლეობის "პატარა გარკვეული ჯგუფის" თხოვნას და აღნიშნულ ტერიტორიაზე ორი მნიშვნელოვანი პროექტი განხორციელდება.

„მინდა შევეხო ერთ პროექტს, რომელიც დიდ დიღომში უნდა განხორციელდეს. ეს არის, ფეხბურთის ფედერაციის მიერ წამოწყებული პროგრამა - სპორტული სივრცეების შესახებ. აღნიშნული პროექტები „უეფას“ გრანტით ხორციელდება. ანალოგიური სამუშაოები ჩატარდა ვაკეში, „ფიზკულტურის ინსტიტუტთან“, სამგორის რაიონში, კონკრეტულად ვარკეთილში, გლდანში, მეხუთე მიკრორაიონში, ასევე ნუცუბიძეზე. თუმცა, არიან ადამიანები, პატარა გარკვეული ჯგუფი, რომელთა მოთხოვნა არის, რომ არა სტადიონი, არამედ გაკეთდეს პარკი, ეწინააღმდეგებიან საფეხბურთო სივრცის დიდ დიღომში მოწყობას. ყოველთვის, ისტორიულად, ამ სივრცეში იყო სტადიონი, თუმცა კიდევ ერთხლე ვიმეორებ, პატარა, გარკვეული ჯგუფის მოთხოვნა არის, რომ ამ ადგილზე არა სტადიონი, არამედ გაკეთდეს პარკი. თუმცა 50 მეტრში, ჩვენ გასულ წელს, დავამთავრეთ რეკრეაციული სივრცის განახლება-რეაბილიტაცია, რომელიც მართლაც ძალიან კარგი გამოვიდა. ვითვალისწინებთ ასევე ამ პატარა ჯგუფის მოთხოვნასაც და საფეხბურთო მოედანთან ერთად, რომელიც აუცილებლად აშენდება, მოეწყობა ასევე, რეკრეაციული სივრცეც, იქ მცხოვრები ადამიანებისთვის და პატარებისთვის. “, - განაცხადა კახა კალაძემ.