„ლეიბორისტული პარტიის“ თავმჯდომარე შალვა ნათელაშვილი აცხადებს, რომ ბიძინა ივანიშვილი ძალიან მალე საბრალდებო სკამზე იჯდება და მასთან ერთად თბილისის საქალაქო სასამართლოში „ქართული ოცნების“ პარლამენტარებიც იჯდებიან - „სპეციალური გალიების გაკეთება გახდება საჭირო, რომ მთელი ეს პარლამენტი დაეტიოს“.

როგორც მან „ტვ პირველის“ ეთერში სტუმრობისას აღნიშნა, სალომე ზურაბიშვილთან და ბიძინა ივანიშვილთან ლაპარაკს მხოლოდ მას შემდეგ აპირებს, რაც ვანო ჩხარტიშვილი მიტაცებული ანაბრების დაბრუნებას დაიწყებს.

„დაიწყოს ვანო ჩხარტიშვილმა ანაბრების დაბრუნება, რომელიც რამდენიმე მილიარდს შეადგენს და რომლის წაღებითაც, ქვეყანას და ხალხს მოუსპო საშუალება, პირველადი კაპიტალით ნორმალური ბიზნესი ეკეთებინა - დაიწყოს ანაბრების დაბრუნება, როგორც ეს გააკეთა აზერბაიჯანმა, როგორც ეს გააკეთა რუსეთმა, სომხეთმა, ბალტიისპირეთმა, პოლონეთმა, უნგრეთმა და ამის შემდეგ ვილაპარაკოთ იმაზე თუ როგორ გავაგრძელოთ მუშაობა ქვეყნის გადასარჩენად... სხვა რაზე მოვაწერო ხელი სალომესთან და ბიძინასთან“,- თქვა ნათელაშვილმა და დაამატა:

„მე დარწმუნებული ვარ, რომ ძალიან მალე, მარტო ივანიშვილი კი არ იჯდება საბრალდებო სკამზე, ქალაქის სასამართლოში სპეციალური გალიების გაკეთება გახდება საჭირო, რომ მთელი ეს პარლამენტი დაეტიოს. როცა ვეუბნებოდი შევარდნაძეს, დაგამხობენ, გაგამასხარავებენ და დაგატოვებინებენ ძალაუფლებას, არ დაიჯერეს; მერე სააკაშვილს ვეუბნებოდით, რომ დაგიჭერენ, ასე თუ გააგრძელეთ, შენი გუნდელებიანად, ახდა ხომ?! ახლა ამათ ვეუბნები, რომ ამათ რაც დაატყდათ, წინა ხელისუფლებებს, მონაგონი იქნება, რაც ამათ ელოდებათ, დიდი გალიები აუცილებლად გამზადდება, რომ ყველა შეეტიოს ივანიშვილიდან დაწყებული, აი, ამ თქვენი დასახელებული დავითულიანით დაგვირგვინებული“.

ნათელაშვილმა გადაცემაში „დღის ამებები“ დედაქალაქში საზოგადოებრივ ტრანსპორტში მგზავრობის გაძვირების, სოციალური სამართლიანობის, პრეზიდენტთან მოლაპარაკებებისა და ოპოზიციის გამარჯვების სტრატეგიაზე ისაუბრა.

მან გააფრთხილა კახა კალაძე, რომ თუ იგი არ დაიხევს უკან, მთელი თბილისი ქუჩაში გამოვა.