„მემარცხენე ალიანსი“-ს გენერალურმა მდივანმა სოსო შატბერაშვილმა დღეს „პირველ პრესკლუბში" გამართულ ბრიფინგზე კვლავ გააჟღერა მოთხოვნა 2016 წლის არჩევნების პროპორციული საარჩევნო სისტემით ჩატარებისა და მაჟორიტარული საარჩევნო სისტემის გაუქმების თაობაზე.

„საქართველოში საარჩევნო სისტემის გაუმჯობესების საკითხებზე, კონსტიტუციაში და საარჩევნო კოდექსში ცვლილებების შეტანის თაობაზე, პარტია „მემარცხენე ალიანსმა“ ინტერპარტიულ ფორმატში წელიწადზე მეტი ხნის განმავლობაში იმუშავა. ინტერპარტიულმა ჯგუფმა შეიმუშავა მემორანდუმი, რაც ითვალისწინებს საარჩევნო სისტემის მთლიანად პროპორციულ სისტემაზე გადასვლას. ეს მემორანდუმი მოიწონეს საპარლამენტო პარტიებმა, პრეზიდენტმა, პარლამენტის თავმჯდომარემ, დიპლომატიურმა კორპუსმა, ასევე მრავალმა არასამთავრობო ორგანიზაციამ. იგი ხელმოწერებით გაფორმდა პრეზიდენტის სასახლეში. აღნიშნულ მემორანდუმს დაეთანხმა ასევე კოალიცია „ქართული ოცნება“, თუმცა მისი ამოქმედება გამოაცხადა 2020 წლიდან. ამის შემდეგ ინტერპარტიულმა ჯგუფმა მუშაობა განაგრძო „ნაციონალურ მოძრაობასა“ და მის სატელიტ შალვა ნათელაშვილთან ერთად, რის გამოც ჩვენ უარი ვთქვით ამ ფორმატში შემდგომ მონაწილეობაზე. მიუხედავად ამისა ჩვენი პარტიის მოთხოვნა ისევ ძალაშია და კიდევ ერთხელ კატეგორიულად მოვითხოვთ - საარჩევნო სისტემის ცვლილებების პროექტზე მუშაობა პარლამენტმა დაუყოვნებლივ დაიწყოს მიმდინარე სესიაზე, რათა არჩევნების მაჟორიტალური სისტემა გაუქმდეს უკვე 2016 წლის საპარლამენტო არჩევნებისთვის", განაცხადა შატბერაშვილმა.