აფხაზეთის მთავრობა დასაშლელია, მათი საქმეები შესასწავლი და შესაბამისი სისხლის სამართლის პასუხისმგებლობა უნდა დაეკისროს ხელმძღვანელ პირებს, - ამის შესახებ სოციალურ ქსელში დევნილთა მინისტრის ყოფილი მოადგილე სანდრო ბრეგაძე წერს.

მისი თქმით, უწყებაში კორუფცია მძვინვარებს და რამდენიმე ათასი დოლარი ქრთამის მიცემის შემდეგ იყო და არის შესაძლებელი დევნილისთვის ბინის ურიგოდ მიღება.

„მე, როგორც დევნილთა მინისტრის ყოფილმა მოადგილემ, მსურს სრული პასუხისმგებლობით განვაცხადო, რომ დევნილებისთვის ბინების გადაცემის პროცესი გახლდათ სრულიად არასამართლიანი და კორუფციის ბუდე.

სწორედ ეს გახლდათ 2 თვეში ჩემი სამინისტროდან წამოსვლის მიზეზი.

როდესაც კორუფციაზე ამოვიღე ხმა, დავიწყე მექრთამე კადრების გამოვლენა, სამსახურიდან გაგდება, მათი ბნელი საქმეების შემოწმება - რამდენიმე დღეში მომხსნეს, ჩემს მიერ დაწყებული გამოძიებები შეწყვიტეს და სხვა სამინისტროში გადამიყვანეს.

ამაზრზენია, რომ ყველამ კარგად იცის, რამდენიმე ათასი დოლარი ქრთამის მიცემის შემდეგ იყო და არის შესაძლებელი დევნილისთვის ბინის ურიგოდ მიღება.

სამართლიანობა მოითხოვს აღინიშნოს - ერთადერთი პატიოსანი კაცი დევნილთა სამინისტროში ყოფილი მინისტრი დარახველიძე გახლდათ (რომელიც ასევე გაათავისუფლეს) - ამავე დროს შეგიძლიათ სხვა მინისტრების და მათი მოადგილეების მილიონიან ქონებებს გადახედოთ და დარწმუნდებით თუ რამხელა ფული იშოვეს დევნილების ხარჯზე ამ ავაზაკებმა.

გენერალურმა პროკურატურამ სასწრაფოდ უნდა დაიწოს აფხაზეთის მთავრობის, დევნილთა სამინისტროს წარსული და ახლანდელი საქმიანობის შესწავლა, გამოიკვლიოს კორუფციის ფაქტები, გააუქმოს არასამართლიანად ჩატარებული ბინების განაწილების გადაწყვეტილებები და დევნილებთან მიმართებაში აღადგინოს სამართლიანობა“, - აცხადებს სანდრო ბრეგაძე.