მაღალმთიანი აჭარა სტიქიას ებრძვის - ხულოში, ქედასა და შუახევში ძლიერმა წვიმამ და ქარმა პრობლემები შექმნა.

აჭარის მაღალმთიან მუნიციპალიტეტებში, ძლიერმა ქარმა ელექტროგადამცემი ხაზები დააზიანა, რის გამოც, მუნიციპალიტეტების სოფლებში, მოსახლეობის ნაწილს ელექტროენერგია არ მიეწოდება.

ქარმა ასევე სახლებს სახურავები გადახადა, წვიმის შედეგად კი მეწყრული პროცესები განვითარდა.

როგორც guardian.ge-ს შუახევის მუნიციპალიტეტის გამგებელმა განუცხადა, აჭარაში მესამე დღეა გადაუღებლად წვიმს. შექმნილია სპეციალური შტაბი, რომელიც ზარალს ითვლის.

„წვიმამ და ქარმა დიდი პრობლემები შეგვიქმნა. ქარმა სახლებს სახურავები გადახადა, ზოგიერთ სოფელში მეწყრული პროცესები დაიწყო. ამ დრომდე, მუნიციპალიტეტის სოფლების მოსახლეობის ნაწილს ელექტროენერგია არ მიეწოდება. გუშინ, საღამოსთვის 90%-ს მიეწოდებოდა, ახლა ვმუშაობთ, რომ ამ საღამომდე სრულად მოხდეს აბონენტებისთვის ელექტროენერგიის მიწოდება. შევქმენით შტაბი და მიმდინარეობს ზარალის დათვლა, წინასწარი მონაცემებით შემიძლია გითხრათ, რომ ზარალი არის ძალიან დიდი. ადგილზე მობილიზებულია სამაშველო ჯგუფები, საგზაო დეპარტამენტი და საგანგებო რეჟიმში მუშაობს ენერგო-პრო ჯორჯია" - აღნიშნა ტარიელ ლონდარიძემ.

შუახევის მსგავსად, მდგომარეობა რთულადაა ქედსა და ხულოშიც. მეწყრული პროცესებია ხულოს მუნიციპალიტეტის სოფლებში: ზედა და ქვედა ვაშლოვანში, ძირკვაძეებში, უჩხოში, თხილვანაში, გელაძეებში და დიდაჭარა-ღორჯომის მიმათულებით.

ქედის მუნიციპალიტეტში მდინარის ადიდების შედეგად, ქედის პარკის ნაწილი დაიტბორა, მანველიძეების საცხოვრებელ სახლს კი წყლის ძლიერმა ნაკადმა საფრთხე შეუქმნა.

რაც შეეხება ხელვაჩაურს, ქარმა სახურავები მაჭახლის ხეობაშიც გადახადა, ელექტროენერგია კი 1 500-მდე აბონენტს არ მიეწოდება.

საერთო ჯამში, სტიქიის გამო, მაღალმთიან რეგიონებში 5 000-ზე მეტი აბონენტი ელექტროენერგიის გარეშეა დარჩენილი.

სტიქიის ზონა, ცოტა ხნის წინათ, საქართველოს ფინანსთა მინისტრმა, ნოდარ ხადურმა და აჭარის ა/რ მთავრობის თავმჯდომარემ, არჩილ ხაბაძემ მოინახულეს.  მათი თქმით, სტიქიით მიყენებულ ინფრასტრუქტურულ ზარალს მთავრობა აანაზღაურებს.