„2002 წელი, „ესენგეს“ წევრი სახელმწიფოების ერთ-ერთი შეკრება. უყურეთ და ყურადღებით მოუსმინეთ, როგორი ღირსეული პასუხი გასცა შევარდნაძემ კაცთმოძულე პუტინს! მისხალი არ შეარჩინა და ბოლოში მადლობაც აქეთ მოახდევინა!“ - აღნიშნულის შესახებ პოლიტოლოგი ჯუმბერ კირვალიძე სოციალურ ქსელ Facebook-ში წერს და The Eduard Shevardnadze Center-ის მიერ გამოქვეყნებულ ვიდეოს აზიარებს, სადაც დსთ-ის ლიდერების არაფორმალურ შეხვედრაზე, ყაზახეთის სამთო-სათხილამურო კურორტ ჩიმბულაკში ჩასული საქართველოს პრეზიდენტი ედუარდ შევარდნაძე ღია ცისქვეშ მოწყობილ პრესკონფერენციაზე რუსეთის პრეზიდენტის, ვლადიმერ პუტინის გამოსვლას დიპლომატიურად პასუხობს.

„აქვე, შევარდნაძის თვითმფრინავში ნათქვამი სიტყვები კარგად გაიაზრეთ“ - განაგრძობს ჯუმბერ კირვალიძე - „და თუ ელემენტარული ანალიზის უნარი გაქვთ, მიხვდებით, რომ შიზოიდ პუტინთან და მის ხელისუფლებასთან მოლაპარაკების გამართვა ერთი-ერთზე, არ შეიძლება!

ეს იმათ გასაგონად, ვინც „შარვლიდან ძვრება“ და ამბობს - „მიგვიშვით პუტინის რუსეთთან პირისპირ სასაუბროდ და ნახეთ რა „შედეგს დავდებთო“! „ახალი ციცერონები“, დიდ გეოპოლიტიკურ საჭადრაკო დაფაზე შევარდნაძესთან შედარებით პაიკებიც არა ხართ! მეტიც, ისიც არ იცით, რამდენმა თქვენზე მეტად პატრიოტმა და პოლიტიკურად ერუდირებულმა წონადმა პიროვნებებმა სცადეს პუტინის გარემოცვის მეშვეობით მასთან საქართველოს ტერიტორიული მთლიანობის პრობლემის მოგვარება, მაგრამ არაფერი გამოუვიდათ! რატომ? იმიტომ, რომ პოლკოვნიკი პუტინი ითხოვს სუვერენული საქართველოს სახელმწიფოებრიობის სრულ დაქვემდებარებას რუსეთზე, საქართველოს კონფედერაციული მოწყობის გზით (მისი გარანტორი რუსეთი გახდება!), სადაც 3 სუბიექტი თანასწორუფლებიან საწყისებზე იქნებიან გაერთიენებულები, ანუ საქართველოს მიერ ე.წ. „სამხრეთ ოსეთის“ და აფხაზეთის „დამოუკიდებელ სახელმწიფოებად აღიარების“ შემდეგ, ისინი თანხმობას განაცხადებენ კონფედერაციაში გასაწევრიანებლად, თუმცა, როცა მოისურვებენ მაშინ დატოვებენ ამ ე.წ. კონფედერაციას, როგორც „სუვერენული და დამოუკიდებელი სახელმწიფოები“!..

მოკლედ, ვისაც ქვეყნის ღალატი არ გაქვთ გულში ჩადებული (სამწუხაროდ, ასეთებიც არიან!), ერთმნიშვნელოვნად იცოდეთ, რომ სანამ „კაგებეშნიკი“ პუტინი იქნება კრემლის პატრონი, მანამ საქართველოს გამთლიანების საკითხი არ გადაწყდება, მეტიც, თუ მთელი ქართველი ერი არ იქნება ერთიანი პუტინის რუსეთის ოკუპაციის და აგრესიის წინააღმდეგ, რუსეთი შეეცდება ქართველების ერთმანეთთან დაპირისპირებას და იმ მზაკვრული გეგმის განხორციელებას, რაზედაც ზემოთ მოგახსენეთ! ფხიზლად, ჭკუით და მტკიცედ, ქართველებო!!!“ - წერს ჯუმბერ კირვალიძე.

The Eduard Shevardnadze Center-ის მიერ გამოქვეყნებულ ვიდეოს კი წამძღვარებული აქვს შემდეგი: „ამერიკის მიერ საქართველოსთვის სამხედრო დახმარების შესაძლებლობა პირველად ჟურნალმა „თაიმმა“ გაახმოვანა, შემდეგ „ვაშინგტონ პოსტსა“ და „ნიუ-იორკ თაიმსში“ გაჩნდა ინფორმაცია, CNN-მა კი პენტაგონის ბრიფინგი გადმოსცა, სადაც ითქვა, რომ საქართველოს პრეზიდენტის პასუხად აშშ საქართველოში გააგზავნიდა 200-მდე სპეცდანიშნულების ძალების ინსტრუქტორს.

როგორც გელა ჩარკვიანი იხსენებს თავის ბესტსელერში „ნაცნობ ქიმერათა ფერხული“ – „ მათ ევალებოდათ ქართველი ჯარისკაცების გაწვრთნა. ეგრეთ წოდებული წვრთნისა და აღჭურვის პროგრამა (T&E) 64 მილიონი დოლარი ჯდებოდა და გულისხმობდა ოთხი 600-კაციანი ქართული ბატალიონის სრულ აღჭურვასა და გაწვრთნას 18 თვის პერიოდში. საქართველოში ამერიკელი სამხედროების შემოსვლის თაობაზე ინფორმაციამ რუსეთის რეაქციულ წრეებში პარანოიდალური რეაქცია გამოიწვია...ატყდა საქართველოსა და მისი პრეზიდენტის აღვირახსნილი ლანძღვა. როგოზინი, ზატულინი, ჟირინოვსკი წინასწარმეტყველებდნენ, რომ მალე საქართველო დაიშლებოდა...“

ამის მიუხედავად, ედუარდ შევარდნაძე დსთ-ს ლიდერების არაფორმალურ შეხვედრაზე ყაზახეთის სამთო-სათხილამურო კურორტ ჩიმბულაკში მაინც ჩავიდა და ღია ცისქვეშ მოწყობილ პრესკონფერენციაზე რუსეთის პრეზიდენტის ვლადიმერ პუტინის გამოსვლას დიპლომატიური პასუხი გასცა“.