GUARDIAN.GE - უკრაინის თავდაცვის მინისტრის მოადგილე, განა მალიარი რუსული სამხედრო დანაკარგების შესახებ სოციალურ ქსელ „ფეისბუქში“ ინფორმაციას ავრცელებს. მისი ცნობით, 24 თებერვლიდან დღემდე, 28 თებერვლის დილის 6:00 საათამდე, რუსული შეიარაღებული ძალების დანაკარგებმა, პირველადი შეფასებით, 5 300 ჯარისკაცი შეადგინა.

მისივე თქმით, მტრის სავარაუდო ჯამური დანაკარგები ასეთია: 29 ერთეული თვითმფრინავი, 29 ერთეული ვერტმფრენი, 191 ერთეული ტანკი, 816 ერთეული ჯავშანტრანსპორტიორი, 74 ერთეული საარტილერიო დანადგარი, ერთი ერთეული საჰაერო თავდაცვის სისტემა BUK -1 და Grad-21; 291 ერთეული საავტომობილო ტექნიკა, 60 ერთეული საწვავის ავზი, 3 ერთეული უპილოტო საფრენი აპარატი, 2 ერთეული საზღვაო ხომალდი/კატერი, 5 ერთეული ჰაერსაწინააღმდეგო თავდაცვის სისტემა. პირად შემადგენლობას შორის დანაკარგი კი დაახლოებით 5 300 ჯარისკაცია (მოითხოვს დაზუსტებას).

„ინფორმაცია საორიენტაციოა და შესაძლოა, დაზუსტდეს, იქიდან გამომდინარე, რომ ბრძოლების მიმდინარეობისას მისი მოპოვება უკიდურესად რთულია, რადგან მეთაურები, პირველ რიგში, ფოკუსირებას ბრძოლის წარმართვაზე ახდენენ“, - აცხადებს მალიარი.

რუსეთის თავდაცვის სამინისტრომ აღიარა, რომ მისმა ძალებმა დანაკარგები განიცადეს უკრაინაში შეჭრის დროს, მაშინ როცა რამდენიმე დღის განმავლობაში აცხადებდა, რომ გარდაცვლილები არ ჰყოლია. თუმცა რუსეთის თავდაცვის უწყებას დაღუპულთა რაოდენობა არ დაუსახელებია.