GUARDIAN.GE - რუსეთის შეიარაღებული ძალების უკრაინაში შეჭრიდან მე-5 დღეს კრემლი საკმაოდ შორს არის მისი საბოლოო გეგმების განხორციელებისაგან, რაც შესაძლოა უკრაინის მთავრობის დამხობას და ხელისუფლების სათავეში პუტინის მარიონეტი ლიდერის მოყვანას უკავშირდებოდეს. მიუხედავად იმისა, რომ რუსული ძალები უკრაინის დედაქალაქიდან მხოლოდ 30 კილომეტრის მოშორებით იკავებენ პოზიციებს, კიევი მაინც უკრაინელების ხელში რჩება. დღეს დილიდან ქალაქში კომენდანტის საათი გაუქმებულად გამოცხადდა.

ჩრდილო-დასავლეთით მდებარე ქალაქი ჩერნიშევი მთელი ღამის განმავლობაში მძიმე დაბომბვების ქვეშ იყო, მაგრამ მას ისევ უკრაინელები აკონტროლებენ.

რუსეთის თავდაცვის სამინისტრომ აღიარა, რომ მისმა ძალებმა დანაკარგები განიცადეს უკრაინაში შეჭრის დროს, მაშინ როცა რამდენიმე დღის განმავლობაში აცხადებდა, რომ მას საბრძოლო მოქმედებების დროს დაღუპულები არ ჰყოლია. თუმცა რუსეთის თავდაცვის უწყებას მსხვერპლის რაოდენობა არ დაუსახელებია.

კიევისა და მოსკოვის წარმომადგენლები ბელარუსში სამშვიდობო მოლაპარაკებებისთვის ჩადიან, თუმცა პრეზიდენტმა ვოლოდიმირ ზელენსკიმ განაცხადა, რომ იგი ამ მოლაპარაკებებისგან შედეგებს არ ელოდება.

ამავდროულად, ღამით გავრცელებული ცნობების თანახმად, პუტინის დიდი ხნის მოკავშირე, ბელარუსის პრეზიდენტი ალექსანდრე ლუკაშენკო უკრაინაში ბელარუსი ჯარისკაცების შესაყვანად ემზადება.

მოსკოვზე დასავლეთის უმკაცრესი სანქციების ფონზე კი, რამაც დღეს დილიდან რუბლის 30%-ით გაუფასურება გამოიწვია, რუსეთის ცენტრალური ბანკი საპროცენტო განაკვეთების გაზრდით და ბროკერებისთვის უცხოელების საკუთრებაში არსებული ფასიანი ქაღალდების გაყიდვის აკრძალვით ცდილობს შეაჩეროს დასავლეთის სანქციების გავლენა რუსეთის ეკონომიკაზე.

დიდი ბრიტანეთის ფინანსთა მინისტრმა რიში სუნაკმა აუკრძალა ბრიტანულ ფინანსურ ინსტიტუტებს ტრანზაქციები რუსეთის ცენტრალურ ბანკთან, საგარეო საქმეთა სამინისტროსთან და ქვეყნის სუვერენულ ფონდთან.