დემოკრატიული არჩევნები იქნება წინაპირობა ევროკავშირში გაწევრიანების კანდიდატი ქვეყნის სტატუსის მისაღებად, დემოკრატიული არჩევნები ნიშნავს ოცნების დასასრულს. ამიტომ, კარგია, შეიტანონ, - ასე ეხმაურება „ფეისბუქში“ საქართველოს ყოფილი ელჩი ევროკავშირში, „ლელოს“ დეპუტატი სალომე სამადაშვილი „ქართული ოცნების“ მიერ დაჩქარებული წესით ევროკავშირის წევრობის კანდიდატის სტატუსის მისაღებად მიმართვას.

„რადგან ბევრი მთხოვს განმარტებას, მოკლედ და გასაგებად:

1. ევროკავშირში გაწევრიანებაზე განაცხადის შეტანა ნიშნავს, ქვეყანამ ოფიციალურად მიმართა ევროკავშირს, რომ სურს გახდეს მისი წევრი.

2. ევროკავშირმა ამის შემდეგ უნდა იმსჯელოს, აკმაყოფილებს თუ არა ქვეყანა გაწევრიანების კანდიდატის სტატუსს. (კანდიდატის, და არა წევრის).

3. თუ კი, ამის შემდეგ ენიჭება ქვეყანას გაწევრიანების კანდიდატის სტატუსი და იწყება მოლაპარაკებები.

4. მოლაპარაკებების დასრულების შემდეგ იწყება გაწევრიანების პროცედურა.

5. რამდენად გრძელი პროცესია? გრძელი, საუკეთესო რეფორმატორების მთავრობის ხელშიც კი.

ქართული ოცნება ისე წავა ხელისუფლებიდან, რომ გაწევრიანების კანდიდატის სტატუსის მიღებასააც ვერ მოასწრებს.
რატომ?

კანდიდატი ქვეყნის სტატუსს არავინ მისცემს ქვეყანას, რომელიც დემოკრატიულ არჩევნებს ვერ ატარებს.

დემოკრატიული არჩევნები იქნება წინაპირობა ევროკავშირში გაწევრიანების კანდიდატი ქვეყნის სტატუსის მისაღებად.
დემოკრატიული არჩევნები ნიშნავს ოცნების დასასრულს.

ამიტომ, კარგია, შეიტანონ“, - წერს სამადაშვილი.