GUARDIAN.GE - უკრაინის პრეზიდენტმა, ვოლოდიმირ ზელენსკიმ განაცხადა, რომ რუსეთის თავდასხმას ზაპოროჟიეს ბირთვულ ქარხანაზე შესაძლოა „ექვსი ჩერნობილის“ ტოლფასი გამანადგურებელი შედეგი გამოეწვია. სატელევიზიო მიმართვა მან ასე დაიწყო: „უკრაინელო ხალხო! ჩვენ გადავრჩით ღამით, რომელსაც შეეძლო შეეჩერებინა ისტორიის მსვლელობა - უკრაინის ისტორიის, ევროპის ისტორიის“. მისი თქმით, რუსეთმა იცოდა, რას აკეთებდა, როცა ჭურვებს პირდაპირ სადგურს უმიზნებდა და ამას მან „გაუგონარი დონის ტერორის აქტი“ უწოდა.

რუსი ხალხის მიმართვისას მან თქვა: „ნუთუ როგორ არის ეს შესაძლებელიც კი? ჩვენ ერთად არ ვებრძოლეთ ჩერნობილის კატასტროფის შედეგებს 1986 წელს?“ ზელენსკიმ მოუწოდა რუსებს გამოვიდნენ ქუჩებში და უთხრან თავიანთ მთავრობას, რომ მათ სიცოცხლე უნდათ.

მან აღნიშნა, რომ კავშირზეა მსოფლიო ლიდერებთან, რომლებიც მისი თქმით, „შოკირებული არიან“ ბირთვული ქარხნის გარშემო განვითარებული მოვლენებით.

ზელენსკიმ ასევე მოუწოდა დასავლეთს მხარი დაუჭიროს უკრაინის არასაფრენ ზონად გამოცხადებას „ბირთვული ტერორისტული სახელმწიფოს“ წინააღმდეგ. „რადიაციამ არ იცის სად არის რუსეთი. რადიაციამ არ იცის ჩვენი ქვეყნის საზღვრების შესახებ“, - განაცხადა ზელენსკიმ.

უკრაინის სახელმწიფო ბირთვული რეგულირების ინსპექციის განცხადებით, „ამჟამად ზაპოროჟიეს ბირთვული ქარხნის ტერიტორია რუსეთის ფედერაციის ძალების მიერ არის ოკუპირებული“. „ქარხნის პერსონალი განაგრძობს საქმიანობას ქარხანაში, რაც უზრუნველყოფს ბირთვული ობიექტების სტაბილურ მუშაობას. სამწუხაროდ, სადგურის უკრაინელ დამცველებს შორის არიან დაღუპულები და დაჭრილები“, - აღნიშნულია განცხადებაში.