GUARDIAN.GE - რუსეთის პრეზიდენტმა, ვლადიმერ პუტინმა მოუწოდა საერთაშორისო საზოგადოებას მოახდინოს ურთიერთობების ნორმალიზება რუსეთთან, მეზობელ სახელმწიფოებს კი - რომელთა მიმართაც მოსკოვს, მისი თქმით, „არავითარი ბოროტი ზრახვები“ არ გააჩნია - ურჩია არ მოახდინონ ვითარების ესკალაცია და შეზღუდვების დაწესება.

„ჩვენ არ გვაქვს არავითარი, ჩვენ ამაზე ყოველთვის ვსაუბრობდით, არ გვაქვს არავითარი ბოროტი ზრახვები ჩვენი მეზობლების მიმართ... და ყველა ჩვენი ქმედება, თუკი ისინი წარმოიშობა, ყოველთვის წარმოიშობა რუსეთის ფედერაციასთან დაკავშირებით რაიმე არამეგობრული ქმედების გამო. ვფიქრობ, ყველა უნდა დაფიქრდეს ურთიერთობების ნორმალიზებაზე... მათ ვურჩევდი არ მოახდინონ ვითარების ესკალაცია, არ არსებობს მდგომარეობის გამწვავების, შეზღუდვების დაწესების საჭიროება, ჩვენ ვასრულებთ ყველა ვალდებულებას“, - განაცხადა პუტინმა ახალ რუსულ ბორანზე - „მარშალ როკოსოვსკიზე“ დროშის აღმართვის ცერემონიაზე სიტყვით გამოსვლისას.

„თუ ვინმეს არ სურს ჩვენთან თანამშრომლობა ერთიანი თანამშრომლობის ფარგლებში, და ამით საკუთარ თავს ზიანს აყენებს, რა თქმა უნდა, ეს ჩვენც დაგვაზიანებს“, - დასძინა პუტინმა და დაამატა, რომ რუსული ეკონომიკა არსებულ მდგომარეობასთან ადაპტირებას მოახდენს.

„უბრალოდ მოგვიწევს ზოგიერთი პროექტი ოდნავ განზე გადავდოთ, შევიძინოთ დამატებითი კომპეტენციები. მაგრამ ჩვენ მაინც მოვაგვარებთ ჩვენ წინაშე არსებულ პრობლემებს. საბოლოოდ, ჩვენ ამისგან სარგებელსაც კი მივიღებთ, რადგან დამატებით კომპეტენციებს შევიძენთ“, განაცხადა პუტინმა.