GUARDIAN.GE - რუსეთმა უკრაინის სამხრეთ-აღმოსავლეთით, ალყაში მოქცეული საპორტო ქალაქის მარიუპოლის საავადმყოფოზე დარტყმები განახორციელა. ინფორმაციას BBC ავრცელებს.

ოფიციალური პირები Facebook-ზე გავრცელებულ განცხადებაში აცხადებენ, რომ „რუსულმა საოკუპაციო ძალებმა რამდენიმე ბომბი ჩამოაგდეს ბავშვთა საავადმყოფოს თავზე. ნგრევა კოლოსალურია“. ქალაქის საბჭოს წარმომადგენლის თქმით, მათ ჯერჯერობით არ აქვთ ზუსტი ინფორმაცია მსხვერპლის რაოდენობის შესახებ.

„ქალაქის ცენტრში სამშობიარო განყოფილება, ბავშვთა პალატა და საავადმყოფოს თერაპიული განყოფილება - ყველაფერი ეს განადგურდა მარიუპოლზე რუსული საჰაერო თავდასხმის შედეგად“, - განაცხადა რეგიონული სამხედრო ადმინისტრაციის ხელმძღვანელმა, პავლო კირილენკომ „ფეისბუქზე“ გამოქვეყნებულ ვიდეოში. მისივე თქმით, საჰაერო დარტყმის შედეგად დაშავებულები უახლოეს საავადმყოფოში არიან გადაყვანილი.

BBC აცხადებს, რომ მას არ შეუძლია დამოუკიდებლად გადაამოწმოს ბრალდებები, მაგრამ ადგილობრივმა დეპუტატმა, დმიტრო გურინმა, კორპორაციასთან ინტერვიუს დროს იგივე გაიმეორა.

სულ ახლახან პრეზიდენტმა ზელენსკიმ „ტვიტერში“ გამოაქვეყნა ვიდეო კადრები შემთხვევის ადგილიდან, რასაც მან უწოდა „პირდაპირი დარტყმა“. მასზე ნაჩვენებია დანგრეული ოთახები შენობის დერეფნის გასწვრივ. „ადამიანები, ბავშვები არიან ნანგრევების ქვეშ. სისასტიკე! კიდევ როდემდე იქნება მსოფლიო თანამონაწილე ტერორის იგნორირების?“ - ამბობს ის.

ზელენსკიმ რუსული თვითმფრინავების ფრენების შესაჩერებლად არაერთხელ დაჟინებით მოითხოვა უკრაინის ცის არასაფრენ ზონად გამოცხადება, რასაც ამერიკამ და ნატოს სხვა ქვეყნებმა მხარი არ დაუჭირეს.