GUARDIAN.GE - ამერიკის შეერთებული შტატების ოფიციალური პირების შეფასებით, რუსეთ-უკრაინის ომში პირველი ორი კვირის განმავლობაში დაღუპული რუსი ჯარისკაცების რაოდენობა დაახლოებით 5 000-დან 6 000-ამდეა, - იტყობინება BBC ამერიკულ CBS News -ზე დაყრდნობით. ამავე წყაროს ცნობით, დაჭრილების რაოდენობა 15 000-დან 18 000-ამდე შეადგენს, რაც ემყარება მოსაზრებას, რომ დაჭრილების რიცხვი ჩვეულებისამებრ, დაღუპულებზე სამჯერ მეტია ხოლმე.

ერთ-ერთმა ამერიკელმა ოფიციალურმა პირმა, რომელმაც ანონიმურად დარჩენა არჩია, არსებულ მონაცემებს „ძალიან, ძალიან სერიოზული მსხვერპლი“ უწოდა და სიკვდილიანობის აღნიშნული მაჩვენებელი მეორე მსოფლიო ომის ზოგიერთი ბრძოლის მსხვერპლთა რაოდენობას შეადარა.

უკრაინის ოფიციოზი ამტკიცებს, რომ ბრძოლებში 12 000 რუსი ჯარისკაცია მოკლული. გასულ კვირას რუსეთმა თქვა, რომ უკრაინაში 500 ჯარისკაცზე ნაკლები დაკარგა. დამოუკიდებლად კი, მხარეების მიერ მსხვერპლის შესახებ გავრცელებული მონაცემების გადამოწმება შეუძლებელი ხდება.