ექსპერტ გია ხუხაშვილის განცხადებით, ხელისუფლებას დიდი პრობლემა აქვს, რადგან მისი ლეგიტიმაციის დონე სუსტია. როგორც ხუხაშვილმა გაზეთ „ახალ თაობას“ განუცხადა, ხელისუფლებასაც და ე.წ. მთავარ ოპოზიციურ ძალას ანუ „ნაცმოძრაობას“, ჯამურადაც კი, დაბალი რეიტინგი აქვთ.


ექსპერტის თქმითვე, ლეგიტიმაციის გარეშე დარჩენილები ერთმანეთის გარდა ვერავის ამჩნევენ და მუდმივად თავიანთ კინკლაობას გვაყურებინებენ. ამ დროს საზოგადოება, რომელიც ამ ქვეყანაში მთავარი მოთამაშეა, დავიწყებულია.


„31 ოქტომბრის არჩევნებმა ხელისუფლების პრობლემები კარგად წარმოაჩინა. შეზღუდული კონკურენციის პირობებშიც კი დამაჯერებლობას მოკლებული გამარჯვება მოიპოვეს.


წარმოიდგინეთ, რა მოხდება საპარლამენტო არჩევნებზე, როცა ოპოზიციური პარტიების მთელი სპექტრი მიიღებს არჩევნებში მონაწილეობას. მაღალი აზრი არც ერთ მათგანზე არა მაქვს და ისიც ვიცი, რომ „ქართულ ოცნებას“ დამოუკიდებლად კონკურენციას ვერც ერთი ვერ გაუწევს, მაგრამ ეს არაფერს ნიშნავს.


2016 წლის არჩევნებზე „ქართული ოცნების“ კონკურენტი ქართველი საზოგადოება იქნება და არა რომელიმე პარტია. ამ პოლიტელიტის პირობებში ხელისუფლება არჩევნებს მოიგებს, მაგრამ მისი ლეგიტიმაცია იქნება სუსტი“ - აცხადებს ხუხაშვილი.


მისი თქმითვე, სუსტ ლეგიტიმაციას ქვეყანაში პოსტსაარჩევნო კრიზისი მოჰყვება, რადგან მოსახლეობის დიდი ნაწილი ხელისუფლებას ეტყვის, მე შენ არ ამირჩევიხარო.


„ამის გარდა, მის წინააღმდეგ გაერთიანდება მთელი ოპოზიცია და ძალიან მაინტერესებს, როგორ მოახერხებენ ამ კრიზისის გადალახვას. პირდაპირ გეტყვით, რომ ამის გაკეთება „ქართულ ოცნებას“ ძალიან გაუჭირდება. ასეთი კრიზისის გადალახვა სააკაშვილის ჩამოყალიბებულ რეჟიმსაც კი გაუჭირდა“ - აცხადებს ხუხაშვილი.


newspress.ge