სანამ „ახალი ენგური“ არ გვექნება, მუდამ ვიქნებით რუსეთის ენერგოშანტაჟის ქვეშ. ასეთი „მეორე ენგური“ იყო ნამახვანი, - ამის შესახებ „ნაციონალური მოძრაობის“ დეპუტატი რომან გოცირიძე სოციალურ ქსელ „ფეისბუქში“ წერს.

„საქართველო რუსეთზე ენერგოდამოკიდებული გახდა. მიმდინარე წელსაც დენის იმპორტი ხდება სომხეთიდან და რუსეთიდან. სომხეთი იგივე "გაზპრომია". სომხეთის მთელი ენერგეტიკა ეკუთვნის რუსეთს. ატომური ელექტროსადგური, თბოსადგურები, ჰიდროელექტროსადგურები, მაგისტრალური გაზსადენი, გაზის და ელექტროენერგიის შიდა ქსელი-ყველაფერი რუსეთის მფლობელობაშია(რკინიგზაც).

მხოლოდ ელექტროენერგიის იმპორტი არაა პრობლემა-ენგურის ჰიდროელექტროსადგურიც რუსეთის კონტროლქვეშაა. სანამ „ახალი ენგური“ არ გვექნება, მუდამ ვიქნებით რუსეთის ენერგოშანტაჟის ქვეშ. ასეთი „მეორე ენგური“ იყო ნამახვანი. იგი, როგორც მარეგულირებელი სადგური, ასევე იძლეოდა ალტერნატიული ენერგეტიკის განვითარების შესაძლებლობას. დღეს მისი პერსპექტივა ბუნდოვანია და რომც მოიძებნოს ახალი ინვესტორი, მის აშენებას მრავალი წელი დასჭირდება.

მთავრობა და მის მიერ წახალისებული და გამოზრდილი ექსტრემისტული ჯგუფები არიან დამნაშავეები ამ პროექტის გაჩერებაში. ანაკლიის და ნამახვანის ჩაძირვა იყო რუსეთის სპეცოპერაცია, რომელიც უგუნური ხელისუფლებისა და ადამიანების ხელით განახორციელა“, - აცხადებს რომან გოცირიძე.