უკრაინამ საქართველოდან და მაროკოდან ელჩები გაიწვია. ამის შესახებ უკრაინის პრეზიდენტმა, ვოლოდიმირ ზელენსკიმ ვიდეომიმართვისას განაცხადა. მან დიპლომატიური ფრონტი ერთ-ერთ მთავარ ფრონტად მოიხსენია და დასძინა, რომ საქართველოდან და მაროკოდან ელჩები იმ მიზეზით გაიწვია, რომ მათ ვერ შეძლეს მიეღწიათ რუსეთის წინააღმდეგ სანქციების დაწესებისთვის ან უკრაინისთვის შეიარაღების მიწოდებისთვის.

პრეზიდენტის თქმით, „არსებობენ ისინი, ვინც სხვებთან ერთად უკრაინის თავდაცვისთვის მუშაობენ და ისინი, ვინც დროს კარგავენ და მუშაობენ მხოლოდ თანამდებობაზე დასარჩენად“.

„დღეს ხელი მოვაწერე განკარგულებას უკრაინის ელჩის მაროკოდან გაწვევის შესახებ. ასევე დაბრუნებულია ელჩი საქართველოდან. დიდი პატივისცემის მიუხედავად, არ იქნება იარაღი, არ იქნება სანქციები, არ იქნება შეზღუდვები რუსული ბიზნესისთვის?! – გთხოვთ, ეძებეთ სხვა სამსახური“, – აცხადებს ზელენსკი და დასძენს, რომ უახლოეს მომავალში შედეგებს ელის სამხრეთ ამერიკაში, ახლო აღმოსავლეთში, სამხრეთ-აღმოსავლეთ აზიასა და აფრიკის ქვეყნებში მყოფი უკრაინის წარმომადგენლებისგან, ასევე უკრაინის სამხედრო ატაშეებისგან.