თბილისის მერიის მიერ ახლად აშენებულ საფეხბურთო მოედანზე „მასტერ ლიგის“ ტურნირი დაიწყო, რომელიც თბილისის მერიისა და საქართველოს ფეხბურთის ფედერაციის გუნდებს შორის მატჩით გაიხსნა. გახსნის ღონისძიებაში საქართველოში მყოფი უკრაინელი ბავშვები მონაწილეობდნენ. მატჩი, რომელშიც დედაქალაქის მერი კახა კალაძეც მონაწილეობდა, თბილისის მერიის გუნდის გამარჯვებით, ანგარიშით 3:2 დასრულდა.

„დღეს დაიწყო ძალიან კარგი ტურნირი - „მასტერ ლიგა“, რომელიც თბილისის მერიისა და ფეხბურთის ფედერაციის დაფინანსებით ხორციელდება. მე თვითონ ვმონაწილეობ ამ ტურნირში და მიხარია, რომ ბევრი ახალგაზრდაა ჩართული. თუ გადავხედავთ გასული წლების სტატისტიკას, მაგალითად, წინა წელთან შედარებით, 35 პროცენტითაა გაზრდილი მონაწილეთა რაოდენობა, რაც ძალიან სასიამოვნოა. ჩვენ ყოველთვის წავახალისებთ ჯანსაღი ცხოვრების წესს და ასეთი პროექტები, რა თქმა უნდა, ხელს შეუწყობს სპორტის განვითარებას. პირადად ვარ ჩართული, ვმონაწილეობ ჩემს თანაგუნდელებთან ერთად და მინდა, ყველა მონაწილეს წარმატება ვუსურვო“, - განაცხადა კახა კალაძემ.

მასტერ ლიგა, უკვე მეოთხე წელია, თბილისის მერიის მხარდაჭერით იმართება. აღსანიშნავია, რომ წელს, მონაწილეთა რაოდენობამ,ჯამში, 74 გუნდი შეადგინა. აღნიშნული გუნდები სამ ლიგაში იქნებიან გადანაწილებული (MASTER LEAGUE, MASTER LEAGUE-II და MASTER LEAGUE-III).

რაც შეეხება საფეხბურთო მოედანს, მისი მშენებლობა გასული წლის ნოემბრიდან დაიწყო „მზიურისა“ და ვაკე- საბურთალოს პოლიციის N1 განყოფილების მიმდებარედ არსებული ძველი მოედნის ადგილას.

მოედანზე მოეწყო FIFA-ს სტანდარტის ხელოვნური საფარი, რომელიც ხარისხის შესანარჩუნებლად პერიოდულად დაივარცხნება. გარდა ამისა, 208 მაყურებელზე გათვლილ ტრიბუნებს ჩაუტარდა რეაბილიტაცია; მოეწყო ხის კოტეჯი, სადაც განთავსდა გასახდელები და სველი წერტილები; დამონტაჟდა გარე განათება და მოედნის გარშემო დაიგო ქვაფენილი. პროექტის საერთო ბიუჯეტმა 1 184 530 ლარი შეადგინა.