GUARDIAN.GE - „კგბ“-ს ყოფილი რუსი აგენტის, ალექსანდრე ლიტვინენკოს მკვლელობაში ერთ-ერთი მთავარი ეჭვმიტანილი დიმიტრი კოვტუნი რუსეთის დედაქალაქ მოსკოვში, საავადმყოფოში „კოვიდ-19“-ით გარდაიცვალა. ინფორმაციას რუსული საინფორმაციო სააგენტო „ტასი“ ავრცელებს.

დიმიტრი კოვტუნი იყო ერთ-ერთი იმ ორთაგან, ვინც დიდი ბრიტანეთის ხელისუფლების მტკიცებით, 2006 წელს ლონდონში სასიკვდილოდ მოწამლა ლიტვინენკო.

ლიტვინენკოს მკვლელობაში კიდევ ერთმა ეჭვმიტანილმა, ანდრეი ლუგოვოიმ სოციალურ მედიაში დაწერა, რომ მისი „ერთგული მეგობარი“ გარდაიცვალა.

ლიტვინენკო, კგბ-ს ყოფილი ოფიცერი, რომელიც ბრიტანეთის მოქალაქე გახდა და რუსეთის პრეზიდენტის, ვლადიმერ პუტინის ღია კრიტიკოსი იყო, რადიოაქტიური ნივთიერებით ლონდონის სასტუმროში მოწამლეს, სადაც ის დიმიტრი კოვტუნს და ანდრეი ლუგოვოის შეხვდა. ლიტვინენკო შეხვედრიდან მალევე ავად გახდა და საავადმყოფოში გადაიყვანეს. მისი მდგომარეობა გართულდა და რამდენიმე კვირის შემდეგ, 23 ნოემბერს გარდაიცვალა.

10 წლის შემდეგ ჩატარებულმა გაერთიანებული სამეფოს საჯარო გამოძიებამ დაასკვნა, რომ მკვლელობა „სავარაუდოდ დაკვეთილი იყო“ რუსეთის პრეზიდენტის, ვლადიმერ პუტინის მიერ. სასიკვდილო სარეცელიდან ლიტვინენკომ მისი მკვლელობის ბრძანების გაცემაში პრეზიდენტი პუტინი დაადანაშაულა.