რეგიონული განვითარებისა და ინფრასტრუქტურის მინისტრის, ნოდარ ჯავახიშვილის განცხადებით, დანამატი არავისთვის დაუნიშნავს და მისთვის გაუგებარია აუდიტის მიერ დასახელებული ციფრები. ამის შესახენ ნოდარ ჯავახიშვილმა ჟურნალისტებს მთავრობის სხდომის დასრულების შემდეგ განუცხადა.

"ბაზა არ არის სწორად აღებული. როდესაც ეს ციფრები ვნახე, პირველი მე ეს ვიკითხე, არავისთვის არ დამინიშნია დანამატი და როგორ მოხდა დაახლოებით 200%-იანი ზრდა. ბაზა უნდა აიღო შესაბამისი. არ შეიძლება ერთი წლის 6 თვე აიღო და მეორე წლის 12 თვე", - განაცხადა ჯავახიშვილმა.

კითხვაზე, მიზანმიმართულად მოხდა თუ არა ეს, ჯავახიშვილმა განაცხადა, რომ "ალბათ შეეშალათ".

გენერალური აუდიტორი ლაშა თორდია აცხადებს, რომ სახელმწიფო უწყებებში პრემიების გაცემა სახელფასო დანამტებით შეიცვალა.
თორდიას შეფასებით, პრემიების შეზღუდვასთან დაკავშირებით მთავრობის მიერ მიღებულმა დადგენილებამ საკითხის დარეგულირება ვერ უზრუნველყო.
როგორც გენერალურმა აუდიტორმა გადაცემა "არჩევანში" განაცხადა, რეგიონული განვითარების სამინისტროში დანამატების გაცემის ოდენობა 69%-ით გაიზარდა, იუსტიციის სამინისტროში – 206%-ით, სასჯელაღსრულებისა და პრობაციის სამინისტროში – 412%-ით, კულტურის სამინისტროში 1509%-ით, დევნილთა სამინისტროში 35%-ით, ჯანდაცვის სამინისტროში – 270%-ით.
მისივე თქმით, თანხობრივ გამოხატულებაში, პრემიის სახით გაცემული ხელფასი 31 მილიონი ლარით შემცირდა, ხოლო სახელფასო დანამატი 45 მილიონით გაიზარდა.