ახალი სპორტის სასახლე დასრულებულია და მზად ვართ, რომ „ევრობასკეტს“ ვუმასპინძლოთ,-ამის შესახებ საქართველოს პრემიერ-მინისტრმა ირაკლი ღარიბაშვილმა თბილისში, ახლად აშენებული სპორტის სასახლის დათვალიერების შემდეგ, ჟურნალისტებთან საუბარში განაცხადა.

მთავრობის მეთაურმა კულტურის, სპორტისა და ახალგაზრდობის სამინისტროსა და მშენებელ კომპანიას მადლობა გადაუხადა და აღნიშნა, რომ კომპანიამ რეკორდულ დროში ააშენა უნიკალური კომპლექსი.

პრემიერ-მინისტრის თქმით, „ევრობასკეტი“1 სექტემბერს გაიმართება, მანამდე კი, 4 ივლისს გაიმართება სატესტო მატჩი.

„მე მინდა ჩვენს მოქალაქეებს ვაცნობო, რომ ჩვენი ქვეყანა მზად არის, რომ „ევრობასკეტს“ ვუმასპინძლოთ, რომელიც 1 სექტემბერს გაიმართება. მანამდე, 4 ივლისს, სატესტო მატჩი გაიმართება, ეს ახალი დარბაზი არის დასრულებული და კიდევე ერთხელ მინდა აღვნიშნო, რომ მზად ვართ, რომ მივიღოთ და ვუმასპინძლოთ „ევრობასკეტს“. მე მინდა მადლობა გადავუხადო კულტურის და სპორტის სამინისტროს, ასევე , მადლობა მინდა გადავუხადო მშენებელ კომპანიას, რომელმაც, შეიძლება ითქვას, რომ რეკორდულ დროში მოასწრო და ააშენა ეს არაჩვეულებრივი, უნიკალური კომპლექსი და მე მინდა ჩვენს მაყურებლებს, სპორტის გულშემატკივრებს მივულოცო დღევანდელი დღე“,- აღნიშნა პრემიერ-მინისტრმა.

პრემიერ-მინისტრმა ირაკლი ღარიბაშვილმა თბილისში ახლად აშენებული სპორტის სასახლე, კულტურის, სპორტისა და ახალგაზრდობის მინისტრ თეა წულუკიანთან ერთად დაათვალიერა.

ახალი სპორტის სასახლის ფართობია 25000 კვადრატული მეტრი და 10 000 მაყურებელზეა გათვლილი. შენობა მულტიფუნქციური სპორტული სივრცეა, რომელსაც შეუძლია ნებისმიერი სახეობის და მასშტაბის სპორტულ და კულტურულ ღონისძიებას უმასპინძლოს.

შენობა აშენებულია თანამედროვე სტანდარტებით და აღჭურვილია უახლესი ტექნოლოგიებით. ახალი სპორტის სასახლე 4 ივლისს "ევრობასკეტის"პირველ ტესტ მატჩს უმასპინძლებს.