სვანეთის ისტორიისა და ეთნოგრაფიის მუზეუმში სვანეთის კულტურული მემკვიდრეობის დაცვისა და მუზეუმის მხარდაჭერის საბჭოს სხდომა გაიმართა.

სვანეთის ისტორიის და ეთნოგრაფიის მუზეუმის დირექტორმა, სამეცნიერო ექსპედიციის ხელმძღვანელმა, პროფესორმა, ზვიად კვიციანმა დამსწრე საზოგადოებას წარუდგინა ხუთი თვის მანძილზე შესრულებული სამუშაოების შუალედური ანგარიში.

სხდომას ესწრებოდნენ მესტიის მუნიციპალიტეტის მერი კაპიტონ ჟორჟოლიანი, მერიის თანამშრომლები, მერის რწმუნებულები ადმინისტრაციულ ერთეულებში, მესტიისა და ზემო სვანეთის ეპარქიის სასულიერო პირები და პედაგოგები.

სხდომაზე განხილულ და დატკიცებულ იქნა საბჭოს წესდება, რომლის შემადგენლობაშიც შედიან:

საბჭოს თავმჯდომარე - სსიპ ეროვნული მუზეუმის, სვანეთის ისტორიის და ეთნოგრაფიის მუზეუმის დირექტორი, სამეცნიერო ექსპედიციის ხელმძღვანელი, პროფ. ზვიად კვიციანი;

საბჭოს საპატიო თავმჯდომარეები - მაღალყოვლადუსამღვდელოესი, მესტიისა და ზემო სვანეთის ეპარქიის მიტროპოლიტი ილარიონი და მესტიის მუნიციპალიტეტის მერი, კაპიტონ ჟორჟოლიანი.

საბჭოს წევრები:

სვანეთის ისტორიის და ეთნოგრაფიის მუზეუმის თანამშრომლები;

მესტიისა და ზემო სვანეთის ეპარქიის სასულიერო პირები;

მესტიის მუნიციპალიტეტის კულტურის სამსახურის მუშაკები და ტერიტორიული ორგანოს რწმუნებულები (გამგებლები);

მესტიის მუნიციპალიტეტის მაცხოვრებლები, რომლებსაც უშუალო შეხება აქვთ ძეგლების დაცვა, შესწავლასა და აღორძინების საკითხში.

საბჭოს მიზანია მხარი დაუჭიროს სსიპ ეროვნული მუზეუმის, სვანეთის ისტორიის და ეთნოგრაფიის მუზეუმის ბაზაზე საექსპერტო-სამეცნიერო საქმიანობის აღდგენას.

ასევე ზრუნვა, სვანეთის კულტურული მემკვიდრეობის გადარჩენისა და შესწავლის საკითხებზე და ამ დარგში საქართველოს კულტურის, სპორტისა და ახალგაზრდობის სამინისტროსა და სსიპ საქართველოს კულტურული მემკვიდრეობის დაცვის ეროვნული სააგენტოსთვის კონსულტაციის გაწევა.

გარდა ამისა, საბჭოს ამოცანას წარმოადგენს სვანეთის ისტორიის და ეთნოგრაფიის მუზეუმის კულტურულ-საგანმანათლებლო მუშაობისთვის ხელშეწყობა მუნიციპალიტეტის მასშტაბით, აგრეთვე მოსახლეობაში გაბნეული არტეფაქტებისა და ექსპონატების შესყიდვა/გადაცემა მუზეუმისათვის.

ინფორმაციას მესტიის მერია ავრცელებს.