„ქართულ ოცნებას“ არ უნდა ქვეყანა რომ ევროკავშირის წევრობის კანდიდატი გახდეს. „ქართული ოცნების“ და ბიძინა ივანიშვილის სურვილია, რომ ყველაფერი დარჩეს ძველებურად, რაც ძალაუფლების უზურპირებას, რეპრესიებს, ფინანსების მითვისებას და დაუსჯელობას ნიშნავს, - ამის შესახებ „ფეისბუქში“ „ერთიანი ნაციონალური მოძრაობის“ დეპუტატი რომან გოცირიძე წერს.

„ყველაფერი გამჟღავნდა. „ქართულ ოცნებას“ არ უნდოდა ევროკავშირში კანდიდატობაზე განაცხადის შეტანა, რადგან იცოდა, რომ მოუწევდა ვალდებულებების შესრულება. ეს ვალდებულებები მათ არაფორმალურ და არადემოკრატიულ მმართველობას უთხრიდა ძირს. ამიტომ ამბობდნენ ბოლო მომენტამდე, რომ 2024 წელს შეიტანდნენ განაცხადს. შემდეგ იძულებული გახდნენ ეს გაეკეთებინათ, რადგან უკრაინა და მოლდოვა ამ გზას დაადგა და ევროკავშირმაც (როგორც სოზარ სუბარმა გაამხილა), სალომე ზურაბიშვილის პირით შემოგვითვალა, რომ ჩვენც შევვერთებოდით. ანუ, ფაქტობრივად სამივე ქვეყნის საკითხი გადაწყვეტილი იყო, მაგრამ ივანიშვილმა ჩაშალა. ეს დაადასტურა სალომე ზურაბიშვილმაც მის ბოლო პერიოდის განცხადებებში.

უფრო მეტიც, „ქართულ ოცნებას“ არ უნდა ქვეყანა რომ ევროკავშირის წევრობის კანდიდატი გახდეს, რადგან მას მოსდევს კიდევ უფრო მეტი ვალდებულებების შესრულება (რაც ვნახეთ უკრაინისა და მოლდოვის მაგალითზეც).

„ქართული ოცნების“ და ბიძინა ივანიშვილის სურვილია, რომ ყველაფერი დარჩეს ძველებურად, რაც ძალაუფლების უზურპირებას, რეპრესიებს, ფინანსების მითვისებას და დაუსჯელობას ნიშნავს.

საკუთარი კეთილდღეობა ქვეყნის ინტერესების საზიანოდ - ესაა ბიძინა ივანიშვილის კლანის სამოქმედო პროგრამა. არ გამოუვათ“, - აცხადებს რომან გოცირიძე.