გაკვირვებული ვართ თეა კატუკიას მხრიდან საქართველოს საგარეო საქმეთა სამინისტროს მიმართ წაყენებული ცილისმწამებლური ბრალდებებით, - ასე გამოეხმაურა ქართული საგარეო უწყება საფრანგეთში საქართველოს საგანგებო და სრულუფლებიანი ელჩის, თეა კატუკიას განცხადებას თანამდებობის დატოვების შესახებ.

საგარეო საქმეთა სამინისტროს ცნობით, ელჩმა თანამდებობა დატოვა მასთან წინასწარი კონსულტაციის საფუძველზე, რა დროსაც თეა კატუკიას განემარტა, რომ უწყება არ იყო კმაყოფილი მისი საქმიანობით საფრანგეთში ელჩად ყოფნის პერიოდში.

„სამწუხაროდ, მან ვერ უზრუნველყო მასზე დაკისრებული უფლება-მოვალეობების ჯეროვნად შესრულება და ევროპის ამ უმნიშვნელოვანეს ქვეყანაში, საქართველოს ინტერესების სათანადოდ დაცვა. შესაბამისად, უწყებამ ქ-ნ თეასთან კონსულტაციის საფუძველზე მიზანშეწონილად ჩათვალა აღნიშნული პოზიციიდან მისი გამოწვევა.

მოგეხსენებათ, საფრანგეთთან საქართველოს ურთიერთობები, მათ შორის ჩვენი ქვეყნის ევროპული და ევრო-ატლანტიკური ინტეგრაციის არსებული დღის წესრიგის გათვალისწინებით, გადავიდა უმნიშვნელოვანეს ეტაპზე, რაც მოითხოვს საელჩოში ხელმძღვანელ პოზიციაზე მაღალი კვალიფიკაციისა და გამოცდილების მქონე დიპლომატის მივლინებას“, - ნათქვამია საგრეო უწყების განცხადებაში.

საქართველოს საგანგებო და სრულუფლებინამ ელჩმა საფრანგეთში, თეა კატუკიამ თანამდებობა დატოვა და ამის მიზეზად საქართველოს საგარეო საქმეთა სამინისტროს მხრიდან მასზე „მუდმივ რეჟიმში განხორციელებული ზეწოლა“ დაასახელა.