აფხაზეთიდან იძულებით გადაადგილებულ პირთა-დევნილთა მომსახურების სააგენტომ, საქართველოში სლოვაკეთის რესპუბლიკის საელჩოსთან თანამშრომლობით, სლოვაკეთის საერთაშორისო თანამშრომლობის განვითარების სააგენტოსგან მოპოვებული გრანტით ხონის მე-4 საჯარო სკოლის კომპიუტერული ლაბორატორია მოაწყო. პროექტის ფარგლებში, სკოლის კომპიუტერული ლაბორატორია აღიჭურვა პერსონალური კომპიუტერებით, პლანშეტებითა და პრინტერებით.

აღსანიშნავია, რომ ხონის მე-4 საჯარო სკოლის მოსწავლეების უმრავლესობას აფხაზეთიდან იძულებით გადაადგილებული, მათ შორის სოციალურად დაუცველი ბავშვები წარმოადგენენ, რომელთაც პროექტის ფარგლებში, შესაძლებლობა აქვთ ისარგებლონ თანამედროვე სტანდარტებით აღჭურვილი კომპიუტერული სერვისებით.

კომპიუტერული ლაბორატორიის გახსნის ღონისძიებას ესწრებოდნენ - აფხაზეთის ავტონომიური რესპუბლიკის იძულებით გადაადგილებულ პირთა მინისტრი დავით ფაცაცია, მინისტრის პირველი მოადგილე გურამ მისაბიშვილი, ხონის მუნიციპლიტეტის მერი ლადო ჯურხაძე, საქართველოში სლოვაკეთის რესპუბლიკის საელჩოს კონსული სუზანა პალოსოვა, აფხაზეთიდან იძულებით გადაადგილებულ პირთა-დევნილთა მომსახურების სააგენტოს დირექტორი სალომე დოლიძე, სამინისტროსა და ხონის მე-4 საჯარო სკოლის წარმომადგენლები.

ღონისძიების დასასრულს აფხაზეთის ავტონომიური რესპუბლიკის მთავრობის წარმომადგენლებმა და სხვა მოწვეულმა სტუმრებმა დაათვალიერეს ევროკავშირის მხარდაჭერით გარემონტებული ხონის მე-4 საჯარო სკოლასთან მდებარე საბავშვო ბაღი.