GUARDIAN.GE - 28 სექტემბერს, ოკუპირებულ აფხაზეთში ვიზიტისას ბელარუსის პრეზიდენტმა ალექსანდრ ლუკაშენკომ განაცხადა, რომ წინა დღით აფხაზეთის პრობლემები რუსეთის ფედერაციის პრეზიდენტთან, ვლადიმერ პუტინთან განიხილა.

„ჩვენ ძალიან დიდხანს, დაღამებამდე განვიხილეთ ეს საკითხები. იგი აფხაზეთის პრობლემებსა და საქმეებში ძალიან არის ჩართული, ჩემზე უფრო მეტად. ამაზე ხანგრძლივად არ ვისაუბრებ, ჩვენ ერთ დასკვნამდე მივედით: რომ აფხაზეთი არსებობს და მას რუკიდან ვერ წაშლი, არავითარ სანქციას არ შეუძლია ეს გააკეთოს. აფხაზეთი, როგორც იგი [პუტინი] ამბობს, არ შეიძლება მიტოვებული იყოს, მას უნდა დაეხმარო, რათა ამ აყვავებულმა მხარემ და იმ ადამიანებმა, რომლებიც აქ ცხოვრობენ, ნორმალურად იცხოვრონ“, - განაცხადა ბელარუსის პრეზიდენტმა.

ლუკაშენკოს განცხადებით, აფხაზეთში იმის გამო არ ჩასულა, რომ „რაიმე მდგომარეობა გართულდა“. „ჩვენ ნორმალური სიტუაცია გვაქვს, არავითარი გეოპოლიტიკით არ ვიტანჯებით. ჩვენ მხოლოდ გვსურს, როგორც თქვენც - მშვიდობიან, კეთილ, შრომისმოყვარე ხალხს, თანხმობაში ცხოვრება“, - თქვა ლუკაშენკომ.

მისი თქმით, ურთიერთობების ფუნდამენტი ეკონომიკური და სავაჭრო კავშირები უნდა გახდეს.

„ჩვენ ჩამოვედით, როგორც კეთილმოსურნეები და თუკი რაიმეთი დაგეხმარებით და თუ ეს თანამშრომლობა ორმხრივად სასარგებლო იქნება, ჩვენ ამას გავაკეთებთ. მოდი ამაზე ბევრი ვისაუბროთ. მე, როგორც თქვენ იცით, უკვე გამოცდილი ადამიანი ვარ, პოლიტიკაშიც და სხვა სფეროებშიც. ვისაუბროთ, ვიფიქროთ, როგორ ვიცხოვროთ შემდგომ. მთავარია, რომ აქ ხალხი ღირსეულად ცხოვრობდეს, რადგან დედამიწის ეს სამოთხისებური მხარე ამას იმსახურებს. ხოლო აქ ხალხი წმინდაა. ამას პირფერობით არ გეუბნებით: წმინდაა! მე ეს მახსოვს საბჭოთა დროიდან, როცა აქ ვიყავი ჩამოსული. ამიტომაც, ჩვენ გვინდა გავდოთ არა უბრალოდ მეგობრობის ხიდი, არამედ დავამყაროთ ძალიან სერიოზული ურთიერთობები ერთმანეთში“, - განაცხადა ალექსანდრ ლუკაშენკომ.