GUARDIAN.GE - წალკის მუნიციპალიტეტის სოფელ აშკალის საჯარო სკოლის დირექტორის, ვაჟა ზურნაჩიანის განცხადებით, წლევანდელი წელი განსაკუთრებით მნიშვნელოვანი იყო არაქართულენოვანი სკოლებისთვის იმ მხრივ, რომ სომხური ენისა და ლიტერატურის, ასევე აზერბაიჯანული ენისა და ლიტერატურის პრაქტიკოს მასწავლებლებს პირველად მიეცათ გამოცდებზე გასვლის, თავიანთი კომპეტენციის ამაღლებისა და ფინანსური მდგომარეობის გაუმჯობესების საშუალება.
„დიდი მადლობა მინდა ვუთხრა საქართველოს ხელისუფლებას, რომ ეთნიკური უმცირესობების წარმომადგენლებს ყველანაირად უწყობს ხელს. წელს პირველად მიეცათ საშუალება არაქართულენოვანი სკოლების მშობლიური ენის პედაგოგებს გამოცდებზე გასულიყვნენ და აემაღლებინათ თავიანთი კომპეტენცია. ჩვენი სკოლიდან სომხური ენისა და ლიტერატურის ორი მასწავლებელი იყო გასული გამოცდაზე, მათგან ერთმა, გაიანე მანუკიანმა, წარმატებით ჩააბარა გამოცდა, მეორეს ქულები დააკლდა. წამყვანობის ერთი მსურველიც გვყავდა, თუმცა მასაც დააკლდა ქულები. ახლა, საერთო ჯამში, სკოლაში 7 უფროსი მასწავლებელი და ერთი წამყვანი გვყავს, ამას მომავალი წლიდან, სავარაუდოდ, გაინე მანუკიანიც დაემატება, მას შემდეგ, რაც ქართულ ენაშიც შესაბამისი კომპეტენციის დადასტურებას მოახერხებს. ძალიან მნიშვნელოვანია მასწავლებლებისთვის სტატუსის ამაღლება. ეს ნიშნავს, როგორც უკეთეს ხელფასს, ასევე უკეთეს განათლებას“, - განუცხადა GUARDIAN.GE-ის ვაჟა ზურნაჩიანმა.
GUARDIAN.GE-ის ფოტოზე: წალკის მუნიციპალიტეტის სოფელ აშკალის საჯარო სკოლის დირექტორი ვაჟა ზურნაჩიანი
ზურნაჩიანის ინფორმაციით, წელს სკოლა რვა მეთორმეტეკლასელმა დაამთავრა, მათგან სამმა ოქროს მედალზე.
„ოქროს მედალოსანი სამი მოსწავლიდან ორმა თბილისში განაგრძო სწავლა, ერთმა ერევანში. დანარჩენმა ხუთმაც, რამდენადაც მაქვს ინფორმაცია, თბილისში ჩააბარა. მიუხედავად რთული ბოლო წლებისა, პანდემია მაქვს მხედველობაში, მოსწავლეთა აკადემიური მოსწრების დონე მაღალი იყო. მე, პირადად, ონლაინ სწავლებას არ მივიჩნევ გამართლებულ მეთოდად, რადგან თუ მოსწავლეს პირდაპირი კონტაქტი არ აქვს მასწავლებელთან, ისე სწავლება სრულყოფილი არ მგონია. ახლა უკვე მივეჩვიეთ პადემიასაც და საბედნიეროდ, აღარ დგას იმის საშიშროება, რომ სკოლები დაიხუროს და კვლავ ონლაინ სწავლებაზე გადავიდეთ“, - უთხრა GUARDIAN.GE-ის ვაჟა ზურნაჩიანმა.
დირექტორის თქმით, სკოლაში წელს ვიდეოკამერები დამონტაჟდა და კიდევ უფრო უსაფრთხო გახდა სასკოლო გარემო.
„ვიდეოკამერების დამონტაჟების შემდეგ ბავშვებში დისციპლინის დონემ უფრო მოიმატა. როგორც ჩანს, ეს ბუნებრივიცაა, რადგან იციან, რომ მათი ქცევა უფრო მეტი კონტროლის ქვეშ არის მოქცეული. ზოგადად, ახალი სასწავლო წელი კარგად დაიწყო. ზამთრისთვისაც მომზადებული ვართ. მოგეხსენებათ, როგორი მკაცრი ზამთარი იცის წალკის მუნიციპალიტეტში. სრულად გვაქვს მომარაგებული გათბობისთვის საჭირო შეშა და საწვავი. მთავარია, ვიცით, რომ სწავლა საკლასო ოთახებში გაგრძელდება, რაც დიდ ბედნიერებას გვანიჭებს ყველას - მასწავლებლებს, მოსწავლეებს, მათ მშობლებს. ვფიქრობთ, წლევანდელ სასწავლო წელსაც კარგ შედეგებს ვაჩვენებთ“, - განუცხადა GUARDIAN.GE-ის ვაჟა ზურნაჩიანმა.
მან აღნიშნა, რომ საქართველოს განათლებისა და მეცნიერების სამინისტროს მიერ გამოცხადებულ დირექტორების სერტიფიცირების პროცესში თავად არ აპირებს მონაწილეობას.
„მე არ ვაპირებ ამაში მონაწილეობას. საკმაო ხანი ვიმუშავე სკოლაში მასწავლებლად, სასწავლო ნაწილის გამგედ, დირექტორად (იღიმის). ჩვენი სკოლიდან ჯერჯერობით არავინ დარეგისტრირებულა გამოცდაზე. მოგეხსენებათ, რეგისტრაციის ბოლო ვადა 4 დეკემბერია და ამის შემდეგ უფრო ზუსტი ინფორმაცია მექნება“, - განაცხადა წალკის მუნიციპალიტეტის სოფელ აშკალის საჯარო სკოლის დირექტორმა, ვაჟა ზურნაჩიანმა GUARDIAN.GE-ისთან საუბრისას.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.