GUARDIAN.GE - სსიპ მარნეულის მუნიციპალიტეტის სოფელ ზემო სარალის აზერბაიჯანულენოვანი საჯარო სკოლის დირექტორის, მამედ პირიევის განცხადებით, მნიშვნელოვანია, რომ აზერბაიჯანული ენისა და ლიტერატურის მასწავლებლებს 2022 წელს პირველად მიეცათ კვალიფიკაციის ამაღლების საშუალება. მისი თქმით, ზემო სარალის საჯარო სკოლიდან გამოცდაზე გასულმა თარგულ იუსუფოვამ 10 კრედიტი დააგროვა და 48-საათიანი ტრენინგის წარმატებით გავლის შემდეგ იგი აზერბაიჯანული ენისა და ლიტერატურის უფროსი მასწავლებლის სტატუსს მიიღებს.

GUARDIAN.GE-ის ფოტოზე: მარნეულის მუნიციპალიტეტის სოფელ ზემო სარალის საჯარო სკოლის დირექტორი მამედ პირიევი

როგორც GUARDIAN.GE-ის მამედ პირიევმა უთხრა, ზემო სარალის საჯარო სკოლაში 2022-23 სასწავლო წელს მატებაა და 130 მოსწავლე ირიცხება, დასაქმებული 29 პედაგოგიდან 11 უფროსი მასწავლებელია, ერთი - ქართულის როგორც მეორე ენის მასწავლებელი ნათია გოგიაშვილი - წამყვანი, დანარჩენები კი პრაქტიკოსი. ერთ-ერთმა პედაგოგმა, აფის პირიევმა კი, 3 საგანი - ისტორია, გეოგრაფია და ბუნება - ჩააბარა და აღნიშნული საგნების უფროსი მასწავლებელი გახდა.

თავად მამედ პირიევი გეოგრაფიას ასწავლის და საგნის გამოცდაზე ჯერ არ გასულა, თუმცა მომავალში აპირებს. მან პედაგოგიური უნივერსიტეტი აზერბაიჯანის დედაქალაქ ბაქოში დაამთავრა, რის შემდეგაც მშობლიურ სოფელში დაბრუნდა და უკვე 45 წელია სკოლაში გეოგრაფიას ასწავლის, 1998 წლიდან კი დირექტორის თანამდებობაზე მუშაობს.

მამედ პირიევი დირექტორთა სერტიფიცირებაში მონაწილეობას აპირებს და უკვე დარეგისტრირდა კიდეც. საქართველოს განათლებისა და მეცნიერების სამინისტროს ცნობით, დირექტორობის მსურველთა სერტიფიცირება ორ საფეხურს – ტესტირებასა და გასაუბრებას მოიცავს, თუმცა სამინისტროს ჯერჯერობით არ გამოუქვეყნებია ინფორმაცია, თუ როდის ჩატარდება ტესტირება. სერტიფიცირების მსურველთა რეგისტრაცია კი, 2022 წლის 24 ოქტომბერს დაიწყო და 4 დეკემბრის ჩათვლით არის შესაძლებელი შემდეგ ბმულზე: https://directors.mes.gov.ge 

მამედ პირიევი ამბობს, რომ განათლების სისტემაში მიმდინარე რეფორმა არაქართულენოვან სკოლებს უფრო მეტი განვითარების საშუალებას აძლევს და უზრუნველყოფს ყველა თაობის პედაგოგის ჩართვას საქართველოს სახელმწიფო ენის შესწავლის პროცესში.

„ჩვენს ბავშვობაში, იცით, რომ ქართული ენის სწავლებას არ ექცეოდა დიდი ყურადღება, ჩვენს სოფელშიც და გარშემოც სულ აზერბაიჯანულენოვანი მოსახლეობაა და ერთმანეთთან კომუნიკაციის ენა, მოგეხსენებათ, აზერბაიჯანულია. ამიტომაც ან არ ვიცით, ან ცუდად ვიცით ქართული. თუმცა, ბოლო ათწლეულების განმავლობაში, ამ მხრივ მდგომარეობა თანდათან გაუმჯობესდა და ახლა ჩვენი სკოლის კურსდამთავრებულების 90%-ზე მეტი თბილისში მიდის სასწავლებლად.

„შეიძლება ითქვას, რომ ჩვენი სოფლების ახალგაზრდა თაობის წარმომადგენლებმა უკვე საკმაოდ კარგად იციან ქართული ენა. მაგალითად, გეტყვით, რომ 3 წლის წინ აინურ ახმედოვამ (მაღლა ფოტოზე ხელმარცხნივ) ოქროს მედალზე დაამთავრა ჩვენი სკოლა და ახლა თბილისის სამედიცინო უნივერსიტეტში წარმატებით სწავლობს. მან ასევე პირველი ადგილი დაიკავა ერთ-ერთ პროექტში, რომელიც ქალების წინააღმდეგ ძალადობას გმობს. გვყავს სხვა წარმატებული კურსდამთავრებულებიც.

„მინდა გითხრათ, რომ საქართველოს ხელისუფლება ჩვენ მიმართ დიდ ყურადღებას იჩენს. ჩვენი მხრივ, ვცდილობთ თანამედროვე მოთხოვნებს ავუწყოთ ფეხი“, - განუცხადა GUARDIAN.GE-ის მამედ პირიევმა რუსულ ენაზე.