გიული ალასანია - ფოტო: „მთავარი არხის“ ვიდეოკადრიდან

ჩანაწერი არ მომისმენია, არც მინდა, მოვისმინო, – ამის შესახებ საქართველოს ყოფილი პრეზიდენტის, მიხეილ სააკაშვილის დედამ, გიული ალასანიამ ტელეკომპანია „რუსთავი 2“-ის მიერ გავრცელებულ აუდიოჩანაწერთან დაკავშირებით საქართველოს საზოგადოებრივი მაუწყებლის „პირველ არხს“ განუცხადა.

„ეს არის სისულელე. საიდან მოიგონეს საერთოდ, რა ჩანაწერი, რას ბოდავენ, რას ჩხლართავენ. არ მომისმენია ეს ჩანაწერი, არც მინდა, მოვისმინო და არც დრო არ მაქვს ამისი. ყველა ხედავს, რითიც ვარ დაკავებული და რასაც ვაკეთებ. ჩანაწერი მოიგონეს ახლა ახალი“,- განაცხადა გიული ალასანიამ.

ტელეკომპანია „რუსთავი 2“-მა აუდიოჩანაწერი გაავრცელა, რომლის ნამდვილობა დადასტურებული არ არის. გიული ალასანია ოპოზიციის წარმომადგენლებს „პარაზიტებს“ უწოდებს.

იგი ასევე საუბრობს სააკაშვილის საქართველოში დაბრუნებაში რუსეთის ფაქტორზე. ტელეკომპანიის ცნობით, აუდიოჩანაწერი გაკეთებულია მიხეილ სააკაშვილის საქართველოში ჩამოსვლამდე და უცნობია, ვის ესაუბრება გიული ალასანია.

ჩანაწერის მიხედვით, სააკაშვილის საქართველოში დაბრუნებაში რუსეთის ფაქტორზე ალასანია ამბობს: „მთავარი ის არის, რუსეთი რას ფიქრობს ამ მომენტში“.

გავრცელებულ აუდიოჩანაწერში სავარაუდოდ გიული ალასანია ამბობს: „არ ვიცი, შეიძლება ისევ თვითონ რუსეთმა არ ჩათვალოს საჭიროდ“ [სააკაშვილის უკრაინიდან საქართველოში დაბრუნება].

„უნდათ ახლა გახარიაზე მუშაობა, ახლა თანაც ისიც იციან, რომ გახარია ამ მომენტში ვერაფერს ბევრს ვერ მოიტანს. პროცენტულად არ აქვს ის შედეგი, მაგრამ ამზადებენ მომავლისთვის. ამიტომ ამ სიტუაციაში, მე არ ვიცი ამ ჩემს შვილს აქ რა დახვდება. მე არ ვიცი. აი, შეიძლება ისევ თვითონ რუსეთმა არ ჩათვალოს საჭიროდ“, - ამბობს გიული ალასანია.