თბილისს ახალი, 18-მეტრიანი ავტობუსები სულ მცირე ერთი წელი კიდევ არ ეყოლება. ავტობუსების შესაძენად თბილისის მერიის სატრანსპორტო კომპანიას ტენდერი ჯერ არ გამოუცხადებია. "თბილისის სატრანსპორტო კომპანიის" მოკვლევით, ამ ზომის ავტობუსების წარმოება-მიწოდებისთვის საჭიროა სულ მცირე 12 თვე.

სწორედ 18-მეტრიანი ავტობუსებითა და მათთვის განკუთვნილი ე.წ. სწრაფი დერეფნებით ჰპირდება მერიის სატრანსპორტო სამსახური ქალაქის მოსახლეობას თბილისში მგზავრთა გადაყვანის პრობლემების მოგვარებას.

თბილისის მერმა, კახა კალაძემ 18-მეტრიანი ავტობუსების თბილისის სატრანსპორტო ხაზებზე დამატების პირობა 4 წლის წინ დადო მერად პირველი ვადით არჩევიდან 1 წლისთავზე, "გარემოსდაცვითი ხედვის" პრეზენტაციისას.

"2020 წლიდან დედაქალაქში დამატებით შემოვა სრულიად ახალი სტანდარტის, 18-მეტრიანი 200-მდე ელექტროავტობუსი. თავიდან ვფიქრობდი, რომ 18-მეტრიანი ავტობუსების გადაადგილება დედაქალაქში შეუძლებელი და რთული იქნებოდა, თუმცა იმ კვლევის შედეგებმა, რომელსაც „სისტრა“ ატარებს, აჩვენა, რომ 2020 წლიდან დედაქალაქს აუცილებლად სჭირდება ელექტროავტობუსები, რომლებიც უნდა იყოს 18-მეტრიანი", - თქვა თბილისის მერმა 2018 წლის 22 ოქტომბერს.

2019 წლის თებერვალში კალაძე სამუშაო ვიზიტით გერმანიაში ჩავიდა და მიუნხენში, კომპანია MAN-ის საგამოფენო ცენტრში 18-მეტრიანი ავტობუსები დაათვალიერა.

"კახა კალაძემ საგამოფენო ცენტრში წარმოდგენილი უახლესი მოდელის 18-მეტრიანი ავტობუსი დაათვალიერა, რომლის შემოყვანაც სამომავლოდ თბილისში იგეგმება", - წერდა პრესსამსახური მისი ამ ვიზიტის შესახებ.

2019 წელს 18-მეტრიანი ავტობუსების შესაძენად ტენდერი არ გამოცხადებულა, 2020 წელს კი კორონავირუსის პანდემიის გამო გეგმები შეიცვალა.

"სწრაფ სატრანზიტო დერეფანზე იმოძრავებს 12-მეტრიანი და მომავალი წლიდან უკვე 18-მეტრიანი ავტობუსები", - თქვა თბილისის ვიცე-მერმა, ირაკლი ხმალაძემ თბილისის ავტობუსების ახალი ქსელის პრეზენტაციაზე 2020 წლის ოქტომბერში. საუბარი იყო 2021 წლიდან სატრანსპორტო დერეფნებში 200 18-მეტრიანი ავტობუსის დამატებაზე, თუმცა ტენდერი არც 2021 წელს გამოცხადდა.

2020 წელს, როცა თავდაპირველი დაპირებით, თბილისში ახალ 18-მეტრიან ავტობუსებს უნდა ევლოთ, თბილისის მერი ტრანსპორტის საკითხებზე თითქმის ყველა საჯარო განცხადებაში ახსენებდა ავტობუსების საკითხს. მერიის ოფიციალურ საიტზე, იმ წელს, მინიმუმ, 6 ასეთი განცხადება იძებნება.

2021 წლის 21 სექტემბერს თბილისის მერი ახალი საზოგადოებრივი ტრანსპორტის წარდგენის დროს ამბობს, რომ "მომავალ წელს ვაპირებთ შევიძინოთ 200 ერთეული 18-მეტრიანი ავტობუსი".

ამ განცხადებიდან ერთი თვის თავზეც, თბილისის მთავრობის სხდომაზე კახა კალაძემ გაიმეორა, რომ "მომავალ წელს ვაპირებთ, 18-მეტრიანი ავტობუსების შეძენას. დედაქალაქს 200 ერთეული 18-მეტრიანი ავტობუსი სჭირდება, რომლებიც კონკრეტულ ხაზებზე იმოძრავებენ".

ახალი ავტობუსების შემოყვანის მნიშვნელობაზე საუბრობდა კახა კალაძე 2022 წლის განმავლობაში თბილისის მთავრობის სხდომებზეც. ერთ-ერთ ასეთ სხდომაზე მან აღნიშნა, რომ ტრანსპორტის შესყიდვა წინა წელს უნდა დაწყებულიყო.

"მომავალ წელს ვაპირებთ, შევიძინოთ 18-მეტრიანი ავტობუსები. ეს წელს უნდა გაგვეკეთებინა, მაგრამ გადავწიეთ, იმისთვის, რომ გარკვეული ინფრასტრუქტურული სამუშაოები მოვასწროთ, რათა ავტობუსებმა პრობლემების გარეშე შეძლონ გადაადგილება", - თქვა მან.

2023 წლის იანვრის ბოლოს თბილისის მერიის სატრანსპორტო კომპანიაში რადიო თავისუფლებას უთხრეს, რომ ჯერ არ დასრულებულა ბაზრის კვლევა და არ იციან ზუსტი თარიღი, როდის გამოცხადდება ტენდერი 18-მეტრიანი ავტობუსების შესაძენად. სატრანსპორტო კომპანიის მიერ შესყიდვების სააგენტოსთვის მიწოდებული ინფორმაციიდან კი ირკვევა, რომ ავტობუსების შესყიდვის პროცესი შეიძლება დროში გაიწელოს რამდენიმე მიზეზის გამო:

• სატრანსპორტო კომპანიას დღემდე არ აქვს 18-მეტრიანი ავტობუსებისთვის საჭირო ავტობაზა;

• ავტობაზის აშენებას სჭირდება 15-დან 18 თვემდე;

• შეკვეთიდან ავტობუსების მიწოდებამდე საჭიროა 12-დან 15 თვემდე;

• პირველ ეტაპზე იგეგმება 100 ერთეული 18-მეტრიანი ავტობუსის ყიდვა.

რადიო თავისუფლება