ე.წ კაბელების საქმეს დიდი ისტორია აქვს და ბევრი კამათი გამოიწვია, თუმცა, სასამართლო არის ერთადერთი კომპეტენტური ორგანო , ვისაც შეუძილია თქვას, იყო თუ არა ბრალდების მხარე მართალი, როდესაც ამ პირებს ბრალი წაუყენა, – ამის შესახებ მთავარი პროკურორობის კანდიდატმა, ირაკლი შოთაძემ ფრაქცია “თავისუფალ დემოკრატებთან” შეხვედრის დროს, შესაბამის თემაზე კომენტირებისას განაცხადა.

"თავისუფალი დემოკრატები"ე.წ კაბელების საქმისადმი ირაკლი შოთაძის დამოკიდებულებით დაინტერესდნენ.

“მე ვიცნობ ამ საქმეს და ვიცნობ მტკიცებულებებს. ვფიქრობ, ამ საქმეში არსებობს გონივრულ ეჭვმიღმა სტანდარტი, რომლითაც დასტურდება იმ პიროვნებების მიერ მათზე ბრალად შერაცხული დანაშაულის ჩადენის ფაქტი, რომელსაც მათ პროკურატურა ედავება. შესაბამისად ამას ვამტკიცებთ ჩვენ სასამართლოში”, – განაცხადა ირაკლი შოთაძემ.

ფრაქციას ქონდა კითხვები საიდუმლო დოკუმენტის შესახებ ინფორმაციის გავრცელებასთან დაკავშირებითაც.

შოთაძის განმარტებით, სახელმწიფო საიდუმლოებასთან დაკავშირებულ საკითხებს რაც შეეხება, ერთადერთი კომპეტენტური ორგანო არის კონტრდაზვერვის დეპარტამენტი და მას შეუძლიია განსაზღვროს რა არის საიდუმლო ინფორმაციის შემცველი. შოთაძის მტკიცებით, პროკურატურის მიერ არ გავრცელებულა რაიმე ინფორმაცია, რომელიც კონტრდაზვერვის ინფორმაციით წარმოადგენდა საიდუმლოს შემცველს. შოთაძემ ამავე კონტექსტში “სილქნეტსა” და თავდაცვის სამინისტროს შორის გაფორმებულ ხელშეკრულებაზეც ისაუბრა.

“როდესაც “სილქნეტმა” თავდაცვის სამინისტროსთან გააფორმა საიდუმლო კონტრაქტი, “სილქნეტს” ჰყავდა თავის მხრივ ქვეკონტრაქტორი კომპანიები. შესაბამისად, მათ ძალიან კარგად იცოდნენ, რა სამუშაოებს ახორციელებდნენ. “სილქნეტს” ამ ქვეკონტრაქტორ კომპანიებთან არასაიდუმლო ხელშეკრულება ჰქონდა გაფორმებული. სახელმწიფო უსაფრთხოება რა მიმართულებით უნდა შელახულიყო და შეილახა თუ არა, პროკურატურის მიმართ ბრალდებები უადგილო იქნებოდა”, – განაცხადა მთავარი პროკურორობის კანდიდატმა.