თეთრი სახლი ეროვნული უსაფრთხოების საკითხებში აშშ-ის პრეზიდენტის მრჩევლის, ჯეიკ სალივანისა და საქართველოს პრეზიდენტის, სალომე ზურაბიშვილის შეხვედრის შესახებ განცხადებას ავრცელებს, რომელშიც აღნიშნულია, რომ მხარეები მიესალმნენ საქართველოს მთავრობის ბოლო გადაწყვეტილებას პარლამენტიდან ორი კანონპროექტის უკან გაწვევის თაობაზე.

„ეროვნული უსაფრთხოების საკითხებში მრჩეველი ჯეიკ სალივანი დღეს საქართველოს პრეზიდენტს სალომე ზურაბიშვილს შეხვდა. მათ განიხილეს საქართველოში ბოლო დროს განვითარებული მოვლენები და ხაზგასმით აღნიშნეს მათი ქვეყნების საერთო ინტერესი საქართველოს ევროატლანტიკური ინტეგრაციის მიმართ. მათ ისაუბრეს პრეზიდენტ ზურაბიშვილის მხარდაჭერაზე ერთიანი და ინკლუზიური მიდგომის შესახებ რეფორმების მისაღწევად, რაც აუცილებელია ევროკავშირის წევრობისთვის საქართველოს კანდიდატურის წინსვლისთვის. მათ ასევე გამოხატეს მათი საერთო შეშფოთება კანონპროექტთან დაკავშირებით, რომელიც ითვალისწინებს სამოქალაქო საზოგადოების ორგანიზაციების რეგისტრაციას და სტიგმატიზაციას გარე დაფინანსების მისაღებად, რამაც შეიძლება შეაფერხოს ასობით ქართული არასამთავრობო ორგანიზაციის მნიშვნელოვანი მუშაობა, რაც საზოგადოების გაუმჯობესებას ემსახურება. ისინი მიესალმნენ მთავრობის ბოლო გადაწყვეტილებას ორი კანონპროექტის უკან გაწვევის შესახებ.

დაბოლოს, მათ განიხილეს იმის უზრუნველყოფის საჭიროება, რომ რუსეთმა იგრძნოს სრული ეკონომიკური ფასი იმ სანქციების, საექსპორტო კონტროლის და სხვა ეკონომიკური შეზღუდვების, რომლებიც შეერთებულმა შტატებმა და 30-ზე მეტი მოკავშირისა და პარტნიორის კოალიციამ დააწესეს რუსეთის წინააღმდეგ, რათა პასუხისმგებლობა დაეკისროს პუტინს უკრაინაში წარმოებული ომისთვის. სალივანმა ხაზი გაუსვა, რომ საქართველოს მხრიდან საჭიროა, თავიდან აირიდოს, რომ არ გახდეს სანქციების თავის არიდების ან გვერდის ავლის გზა“, - ნათქვამია თეთრი სახლის გავრცელებულ განცხადებაში.