ირაკლი ღარიბაშვილს შევახსენებ, რომ ტელეკომპანია „იმედის“ ან ნებისმიერ სხვა საქმეში ჩემი დადანაშაულება „ოცნების“ პროკურატურას და სასამართლოსაც არ მოსვლია აზრად, - ამის შესახებ განცხადებას „მთავარი არხის“ დამფუძნებელი, პატიმრობაში მყოფი ნიკა გვარამია „ფეისბუქში“ ავრცელებს.

„საცოდაობას, სახელად ირაკლი ღარიბაშვილს, შევახსენებ, რომ ტელეკომპანია „იმედის“ ან ნებისმიერ სხვა საქმეში ჩემი დადანაშაულება „ოცნების“ პროკურატურას და სასამართლოსაც არ მოსვლია აზრად და არათუ განაჩენი ან ბრალი არ წაუყენებიათ ჩემთვის, დაკითხვითაც არ დავუკითხივარ, არც ამ და არც ხელისუფლებაში ყოფნისას ნებისმიერ ჩემს ქმედებაზე. შესაბამისად, ნებისმიერი ამგვარი პროპაგანდისტული ტყუილი არის პოლიტიკური დევნის მორიგი ეპიზოდი და აუცილებლად წარვადგენ სტრასბურგში.

„რუსთავი 2“-ის საქმეს რაც შეეხება, და ზოგადად კორუფციას, ასევე შევახსენებ ღრმად კორუმპირებულ პრემიერს, რომ „ქართული ოცნებისთვისაც“ კი უპრეცედენტო მიზეზითაა ივანიშვილის მიერ გათავისუფლებული ნეპოტიზმითა და კრონიზმით გამოვლენილი პოლიტიკური კორუფციის გამო“, - წერს ნიკა გვარამია.

ირაკლი ღარიბაშვილმა 24 მარტს, პარლამენტში გამოსვლის დროს ევროპარლამენტარების მიერ ნიკა გვარამიას შესახებ გაკეთებულ შეფასებაზეც ისაუბრა და აღნიშნა, რომ კეზერაშვილის მსგავსად, გვარამიაც დამნაშავეა, კერძო კომპანიას 5 მილიონზე მეტის ზარალი მიაყენა, თუმცა ევროპარალმენტარები ამბობენ, რომ გვარამიაც მათი კრიმინალია და არ აინტერესებთ მის მიერ ჩადენილი დანაშაული.