7-დან 10 მარტის ჩათვლით მიხეილ სააკაშვილის მენიუ გამრავალფეროვნდა, მერე ისევ შეზღუდა საკვების მიღება და დესტრუქციულ კალორაჟს დაუბრუნდა, – უთხრა ჟურნალისტებს საქართველოს ყოფილი პრეზიდენტის, მიხეილ სააკაშვილის ენდოკრინოლოგმა, კლინიკა „ვივამედის“ ექიმმა, სოფო მებუკემ.

ენდოკრინოლოგის თქმით, ათი თვის განმავლობაში საქმის კურსშია სააკაშვილის მენიუსთან დაკავშირებით და პაციენტი იღებს ბევრად ნაკლებ კალორაჟს, ვიდრე მას სჭირდება წონის შესანარჩუნებლად.

„იქიდან გამომდინარე, რომ მე ყოველდღიურად ვითვლიდი კალორიებს, 7-დან 10 მარტის ჩათვლით გამრავალფეროვნდა მისი მენიუ, თუმცა ეს იყო არასტაბილური, ეპიზოდური - მერე ისევ ისე გაგრძელდა, ისევ შეზღუდა და დესტრუქციულ კალორაჟს დაუბრუნდა. დარწმუნების არაერთი მცდელობა, მათ შორის ფსიქოთერაპევტის ჩართვა კალორაჟის გასაზრდელად, უშედეგოა.

ოჯახის წევრებს მოაქვთ ის პროდუქტები, რასაც პაციენტი იღებს, თუმცა ყოფილა შემთხვევა, რაც მოუტანიათ, ისიც ბოლომდე არ აუთვისებია. მოაქვთ ძირითადად ის, რასაც იციან, რომ შეჭამს და არა ის, რასაც ჩვენ ვეუბნებით და რეკომენდაციას ვაძლევთ, რომ მიიღოს. ძალან დიდი კითხვის ნიშნებია, რომ როგორ შეიძლება უფრო რთულად გადასამუშავებელი პროდუქტები იყოს მისთვის კარგად ასათვისებელი, ვიდრე სხვა სასარგებლო. ათი თვის განმავლობაში საქმის კურსში ვარ მენიუსთან დაკავშირებით. ამ მხრივ ახალს ვერაფერს გეტყვით. ყველაფერი გრძელდება ძველებურად. ის იღებს ბევრად ნაკლებ კალორაჟს, ვიდრე მას სჭირდება წონის შესანარჩუნებლად.

მასთან ბოლო ვიზიტი მქონდა 16 მარტს, როდესაც პირადად შევედი და კიდევ ერთხელ შევთავაზე აღნიშნულ საკითხში პროფესორ ენდოკრინოლოგების ჩართულობა და მოწვევა. აქ იყო დასახელებული 4-5 პროფესორი, რაზეც კატეგორიული უარი მივიღე. ის გაღიზიანდა. ჩემი მიზანი იყო აზრთა შეჯერება, მკურნალობის ტაქტიკის შეჯამება, დახმარება. არაერთხელ შევთავაზე პროცესში სხვა პროფესორების ჩართვა და სულ უარს ამბობს. ასევე უარზეა რეაბილიტაციის ჩატარებაზე, როგორებიცაა მასაჟი, ფსიქოთერაპია. ჩვენი არაერთი მცდელობის მიუხედავად, ვერ მივედით იმ კონდიციამდე, რომ მოხდეს მისი კვებითი მდგომარეობის გაუმჯობესება“,- განაცხადა ენდოკრინოლოგმა სოფო მებუკემ.