GUARDIAN.GE - „ლეიბორისტული პარტიის“ თავმჯდომარე შალვა ნათელაშვილი რესპუბლიკური საავადმყოფოს დანგრევის წინააღმდეგ გამოდის და აცხადებს, რომ აღნიშნული კლინიკის დანგრევის შემდეგ, „გამოთავისუფლებულ უზარმაზარ სივრცეზე“ „გასაქცევად გამზადებულ ოლიგარქს“ დაგეგმილი აქვს ბინათმშენებლობა და არაბეთიდან და რუსეთიდან მოქალაქეების მასობრივად ჩამოსახლება.

„დღეს უკვე გაკოტრებულ, გასაქცევად გამზადებულ ოლიგარქს დაგეგმილი აქვს ამ ტერიტორიაზე - ეს არის რესპუბლიკის პირველი კლინიკური საავადმყოფო, ჩვენი სამედიცინო, კულტურული, ისტორიული ძეგლი, სადაც მუშაობს ძალიან მაღალი კლასის სამედიცინო პერსონალი - იგეგმება ამ შენონის დანგრევა და გამოთავისუფლებულ უზარმაზარ სივრცეზე ბინათმშენებლობა, სადაც მასობრივად ჩამოასახლებენ არაბეთიდან და რუსეთიდან დიდი ფულის მქონე არსებებს, რომლებიც 2 000 ევროდან ზევით იყიდიან ამ პრესტიჟულ დასახლებაში თავიანთ პენტჰაუზებსა და ვილებს.

ჩვენ მივმართავთ ჯანდაცვის მსოფლიო ორგანიზაციას, სასწრაფოდ ჩამოვიდეს კომისია, რათა ადგილზე შეამოწმოს ის გენოციდი, რასაც ოლიგარქის რეჟიმი ახორციელებს ჯანმრთელობის დაცვისა და ადამიანის სიცოცხლის სადარაჯო ამ სახელოვან ობიექტზე. ჩვენ მივმართავთ სასამართლოს, რათა გაუქმდეს გადაწყვეტილებები, რომელიც დაკავშირებული იქნება აღნიშნული სივრცის კრიმინალურ ათვისებასთან ადამიანების სიცოცხლისა და ჯანმრთელობის საწინააღმდეგოდ. ხელები შორს ამ ისტორიული ადგილისგან, ამ მართლაც თავდადებული მედიცინის მუშაკებისაგან. ეს უნდა შენარჩუნდეს ისე, როგორც არის, არავითარი რეაბილიტაცია ამ შენობას არ სჭირდება - რეაბილიტაცია და წიხლის კვრით გაგდება სჭირდება ივანიშვილის ოლიგარქიულ რეჟიმს, რაც ძალიან მალე მოხდება ქართველი ხალხის ნებით:, - განაცხადა შალვა ნათელაშვილმა.

რესპუბლიკურ საავადმყოფოში მედიკოსებმა 27 მარტს საპროტესტო აქცია გამართეს და პრემიერ-მინისტრ ირაკლი ღარიბაშვილთან შეხვედრა მოითხოვეს, რათა უშუალოდ მისგან მოესმინათ მკაფიო პასუხი, თუ რა მოელით მათ იმ შემთხვევაში, თუკი საავადმყოფოს შენობა დაინგრევა.

პრემიერ-მინისტრი მედიკოსებს არ შეხვედრია, თუმცა მან საყოველთაო ჯანმრთელობის დაცვის სახელმწიფო პროგრამის 10 წლის იუბილესთან დაკავშირებით გამართულ ღონისძიებაზე სიტყვით გამოსვლისას თქვა, რომ რესპუბლიკური საავადმყოფოს ტერიტორიაზე ახალი სამედიცინო ობიექტი უნდა აშენდეს და ყველა თანამშრომლის სამუშაო ადგილი შენარჩუნებული იქნება.

„გვაქვს ძალიან კარგი ხედვა, თუ როგორ უნდა განვითარდეს რესპუბლიკური საავადმყოფო. საუბარი არის იმავე ადგილზე და არა სხვა ადგილზე ახალი საავადმყოფოს მშენებლობაზე და რა თქმა უნდა, შევინარჩუნებთ ყველა თანამშრომელს, ეს მინდოდა მეთქვა ხაზგასმით, ასე, რომ არავითარი მღელვარების საფუძველი ჩვენ არ გვაქვს“, - განაცხადა ირაკლი ღარიბაშვილმა.