საქართველოს საპატრიარქოს საზოგადოებასთან ურთიერთობის სამსახური მეუფე ნიკოლოზის მოსკოვში ჩასვლასთან დაკავშირებით განცხადებას ავრცელებს, რომელშიც აღნიშნულია, რომ საქართველოს საპატრიარქოს არ ჰქონდა ინფორმაცია, რომ იგი რუსეთში ღვთისმსახურებას ესწრებოდა.

„მედიასა და ინტერნეტსივრცეში გავრცელდა ინფორმაცია, თითქოს ახალქალაქის, კუმურდოსა და კარის მიტროპოლიტი ნიკოლოზი (ფაჩუაშვილი) მოსკოვში რუსეთის პატრიარქ კირილეს ანგელოზის დღის მისალოცად საქართველოს საპატრიარქომ გაგზავნა. აღნიშნულთან დაკავშირებით განვმარტავთ: საქართველოს საპატრიარქოს არ ჰქონდა ინფორმაცია იმის შესახებ, რომ მიტროპოლიტი ნიკოლოზი ამ დღეს ღვთისმსახურებას ესწრებოდა, ვიდრე ინტერნეტში არ გავრცელდა შესაბამისი ფაქტის ამსახველი ფოტომასალა. გარდა ამისა, გარკვევით აღვნიშნავთ, რომ ეს არ ყოფილა მიტროპოლიტ ნიკოლოზის ოფიციალური ვიზიტი. უკანასკნელ პერიოდში იგი არაერთხელ სწვევია მოსკოვს კერძო და პირადი საჭიროებიდან გამომდინარე, რადგან მას რუსეთის დედაქალაქში ჰყავს ოჯახის წევრები და სხვა ახლობლები“, – ნათქვამია განცხადებაში.

უფრო ადრე, მეუფე ნიკოლოზ ფაჩუაშვილმა დაადასტურა, რომ ვიზიტი ოფიციალური არ იყო. როგორც მან განაცხადა, მოსკოვში წირვაზე დასწრების გადაწყვეტილების საქართველოს პატრიარქთან შეთანხმება ვერ მოასწრო.